Tenor l’Uffizi federal da statistica vivan passa 9% dals Svizzers e las Svizras en povradad. Quests umans ston per il solit sa tegnair sur l'aua cun main che 2'000 francs il mais. Cun 1'800 francs sto Christoph Ditzler da Basilea vegnir a frida. Da quella summa sto el pajar tut ils custs da la vita cun excepziun dal tschains per l’abitaziun e las premias da la cassa da malsauns. Quels surpiglia l’agid social enfin tar ina summa maximala.
Sa stentar cun mussaments, quittanzas e sancziuns
Tut ils custs e tut las entradas vegnan controlladas severamain da las autoritads. Ina giada dependent da l’agid social, ins saja sco arrestà en in circul vizius, explitgescha Christoph Ditzler.
Jau spargn ussa per savair laschar operar insacura la nivla grischa. Sche la cassa da malsauns surpiglia ina part dals custs, na sai jau betg.
Suenter ch’el aveva pers sia lavur sco martgadant haja el sa dà tutta fadia da chattar ina nova lavur. El n’haja dentant gì nagina schanza, cunquai ch’el n’aveva betg finì ses emprendissadi. L’emprim haja el stuì viver dad 800 francs il mais, raquinta Christoph Ditzler. Suenter haja l’uffizi dal servetsch social pretendì ch’el sa laschia prepensiunar.
Mancanza da daners, da perspectivas e da chapientscha
L’um da 66 onns ha da cumbatter mintga di cun la povradad ed ils blers effects che quella ha. El n’ha dentant mai sa laschà demotivar ed ha confundà il «Planet 13» a Basilea, in café d’internet e lieu d’inscunter per persunas pertutgadas da povradad ed autras persunas.
Povradad munta il pli savens era isolaziun. Autra glieud è savens sceptica. Jau sun adina sut squitsch da ma giustifitgar e perd uschia blers contacts.
Da sia vita e da l’acziun «2 x Nadal», ch’è in agid per persunas ch’han il medem destin sco el, raquinta Christoph Ditzler en Vita e cretta. El manegia che acziuns da solidaritad sco «2 x Nadal» na sajan natiralmain betg bunas da midar cumplettamain la vita d’ina persuna basegnusa, dentant hajan ellas ina gronda simbolica e sajan insumma ina fitg buna chaussa.
In giubileum – 25 onns «2 x Nadal»
Da quel avis è era Dorothee Minder, la coordinatura da «2 x Nadal» tar la Crusch cotschna. Tge ch’è tenor ella il motiv per il success da l’acziun durant ils davos 25 onns e tge che va spezialmain a cor ad ella, quai raquinta er ella en Vita e cretta.