Chor viril Ligia Grischa – Cantei Romontschs
Il 1972 han ils umens dal chor viril Ligia Grischa e lur dirigent Ernst Schweri registrà la platta «Cantei Romontschs». Sin quel èn da chattar 12 chanzuns popularas rumantschas. Il chor è vegnì fundà 1852 ed ha davent l’entschatta gì l’intent da promover e cultivar il chant rumantsch. Bain inqual commember dal chor è daventà scolast da musica ubain dirigent en auters vitgs. Gia baud han els era gia registrà chanzuns rumantschas, l’emprima registraziun da La Ligia Grischa en l’archiv da RTR è dal 1941. Quai èn dentant be singulas chanzuns registradas sin bindel magnetic. Cun lur platta «Cantei Romontschs» ha il chor fatg sia emprima registraziun cumpletta e cun quai era scrit istorgia da musica. Igl è l’emprima platta d’in chor rumantsch.
Benni & Others – Carezzas
Quai è l’album da debut da Benedetto Vigne ensemen cun 12 amis. Nov atgnas chanzuns ed in arranschament da Benedetto Vigne sco era ina chanzun scritta da Hans Durrer èn rimnadas sin questa platta. Igl è musica tipica per ils onns 70 che tuna suenter Bob Dylan, The Doors e Simon & Garfunkel – simplamain tut per surmiran. Benni & Others n’èra betg ina gruppa fixa mabain ina ch’è adina puspè sa midada. Quella platta n’è betg be stada per Benedetto Vigne il debut commerzial. Era per Corin Curschellas ha quella purtà ina sort debut: Sin quest album chanta ella per l’emprima giada ina chanzun rumantscha.
Vico Torriani e seis cumpagns Engiadinais – Allegra Allegra
«Kalkutta liegt am Ganges» ubain «In der Schweiz» èn gronds hits da Vico Torriani ch’èn famus era lunsch sur ils cunfins svizzers. Durant sia carriera ha el vendì passa 20 milliuns portatuns ed è era daventà en la televisiun in grond star. Sper ils gronds hits datti era chanzuns popularas rumantschas sin plattas sco per exempel «Dorma bain» u «Allegra, Allegra». Quai è era il titel da la platta dal 1975 che Torriani ha registrà ensemen cun in chor maschadà ad hoc da Samedan.
Chapella famiglia Erni – Salüds da l’Engiadina
Anton Erni da Tschlin ha fundà la chapella da famiglia cura che ses uffants Annina, Mengia e Jachen gievan anc a scola. Dapi lura tutga la famiglia Erni tar il repertori da la musica populara da l’Engiadina. En il decurs dal temp han era ils uffants d’Anton Erni e gia la proxima generaziun manà enavant la tradiziun da far musica. Il 1992 han els registrà la platta «Salüds da l’Engiadina». Perquai che la famiglia Erni è creschida ad in crescher sur ils decennis è vegnì furmà cun il temp duas furmaziuns: La chapella famiglia Erni e la Chapella Engiadina. «Salüds da l’Engiadina» è l’emprim album cun musica dad omaduas furmaziuns ord questa gronda famiglia musicala da l’Engiadina.
