Tgi era Alois Carigiet?

Grazia a l’«Uorsin», al «Cabaret Cornichon» u a la creaziun dal traifegl da la lottaria naziunala – Alois Carigiet era ed è puspè omnipreschent cun sias ovras.

purtret da Alois Carigiet.

Legenda da maletgs: Alois Carigiet. Keystone

Alois Carigiet è naschì en ina famiglia da purs a Trun. En la vegliadetgna da 9 onns, han el e sia famiglia lura fatg midada a Cuira, nua ch’el a frequentà las scolas elementaras. La scola chantunala ha el dentant lura interrut a favur d’in emprendissadi sco pictur da decoraziun. Suenter avair lavurà in pèr onns a Turitg en in atelier sco graficher e speratiers sco costumist, ha el avert l’onn 1927 ses agen atelier.

El ha creà surtut culissas e costums per in cabaret, enconuschent sco «Cabaret Cornichon». 1939 è el lura sa retratg en patria ed ha lavurà da là davent sco artist independent, tranter auter sco illustratur da cudeschs per uffants.

Datas biograficas

30.08.1902naschì a Trun
1911-1923scolas ed emprendissadi sco pictur da decoraziun
1927
avertura d’in agen atelier a Turitg
1933confundatur dal legendar «Cabaret Cornichon»
1945
creaziun e naschientscha «Uorsin»
1974premi grischun da cultura
01.08.1985mort a Trun

La lavur da Carigiet sa lascha parter en dus parts: d’ina vart en quella da la grafica applitgada e da l’autra vart en quella dal pictur independent. Sias figurass d’animals per il PKZ, il traifegl da la lottaria naziunala sco er il placat per la Landi (exposiziun naziunala svizra, 1939) èn exempels da sias creaziuns. La pli gronda part a ses renum ha però segir contribuì l’«Uorsin».