Siglir tar il cuntegn

Header

Purtret da Theo Demund cun ghitarra.
Legenda: Theo Demund. mad
cuntegn

Top Pop Rumantsch Top Pop Rumantsch cun Theo Demund

19. Top Pop Rumantsch cun Theo Demund e la chanzun «Adina uss, mai enzacu».

Theo Demund

Las chanzuns da Theo Demund fan in grond artg. Quel cumenza en l'euforia musicala dals zunt fritgaivels onns '80 si en la Cadi, Theo era alura giuvenischem rockadur-battarist. Ed el tanscha enfin tar las fermas emoziuns dad in ambient psichiatric, ses post da lavur actual. Cun auters pleds: sias chanzuns cumbineschan la poesia persunala, misteriusa cun ils tuns che cutizzan las ureglias. Quai è in dals prads preferids da la musica moderna, in champ da frajas bunamain. Ed in cas cler per il Top Pop dal Radio Rumantsch. La chanzun tschernida porta il titel «Adina uss, mai enzacu». In gieu cun pleds cuntraris.

Mo per dir ch'i saja magari meglier a giudair il mument, empè da sa scumbigliar en istorgias passadas u futuras. En ina da las lingias clav di il simpatic chantautur era: «Enzacu stos perdunar, actas vedras manizzar». La melodia, quella dentant n'emblid'ins betg uschè spert.

Theo Demund, annada 1970, è creschì si a Darvella sper Trun. El viva oz a Panaduz e lavura sco assistider psichiatric. En sia giuventetgna ha el sunà battaria tar la gruppa sursilvana Ba-Rock. Pli tard ha el scuvert la ghitarra ed il scharm dal chantautur. Ensemen cun Olivier Pernet e Rolf Caflisch furma el oz il trio Danunder.

Realisaziun

Text e musica: Theo Demund
Producziun: Manfred Zazzi
Ghitarra acustica e chant: Theo Demund
Ghitarra electrica: Jean-Pierre Van Dach
Bass: Dave Maeder
Tastas: Olivier Pernet
Battaria: Rolf Caflisch
Mix: Manfred Zazzi

Text da la chanzun: Adina uss, mai enzacu

Il vargau ha formau
Il passau ha dictau
Las leschas actualas.
Il present ei in vent
Che tucca il mument,
Lai sbatter cun las alas.

Il futur ha buc substanza
Il futur ei ina stanza
Senz`esch e senza savas.
Gl`avegnir buc existent
Distaccaus dil temps present,
Energias sfarlatadas

Adina uss, mai enzacu
Saiel buca nua che setschentel
Adina uss, mai enzacu
Saiel buc e buc damondas tschentel

Mo enzacu stos perdunar
Flommas veglias schar stizzar
Per l`atgna pasch anflar.
Enzacu stos perdunar
Actas vedras manizzar
E sin il vent tedlar.

Adina uss, mai enzacu
Saiel buca nua che setschentel
Adina uss, mai enzacu
Saiel buc e buc damondas tschentel

Sche mon lu mon
Sche stun lu stun

Adina uss, mai enzacu
Saiel buca nua che setschentel
Adina uss, mai enzacu
Saiel buc e buc damondas tschentel