Siglir tar il cuntegn

Header

Navigaziun

Il trio grischun da la gruppa Tawnee en il studio da RTR.
Legenda: Il trio grischun Tawnee. RTR, E. Berther
cuntegn

Top Pop Rumantsch Top Pop Rumantsch cun Tawnee

33. Top Pop Rumantsch cun ina delicatessa transalpina - il trio grischun Tawnee cun la chanzun «Jamie».

Quest Top Pop Rumantsch è ina vaira truvaglia da stad - il trio grischun Tawnee preschenta la ballada «Jamie».

Il trio grischun Tawnee

La muntogna tranter Tavau e Scuol na saja gnanca uschè auta - ins enconuschia in pau las bands viceversa, manegian Andrea Frey, Elias Tsoutsaios e Janic Sarott. Ed uschia è naschì il trio tranter las duas vals, il trio che sa numna en moda exotica Tawnee, la scripziun anglifitgada dal num «Toni», il segund prenum d’Andrea. La band è sa scuntrada avant in onn, e damai ch’ils trais èn repartids studegiond per la Svizra enturn - Andrea mercantil a l’universitad da Son Gagl, Elias publicistica a l’universitad da Turitg, Janic battaria a la scol’auta d’art a Turitg - n’è la situaziun dad exercizi betg dal tut optimala: in pau qua, in pau là. Ma quai na restrenscha strusch la qualitad musicala, anzi, ils Tawnee briglieschan cun in tun fitg omogen, oscillond tranter la vigur dals Muse e la fragilitad dal nov folk transatlantic. Zunt delicata la ballada ch’ils trais ventginards han proponì sco Top Pop Rumantsch, la chanzun d'in'amur vana, adressada ad ina «Jamie» misteriusa. Elias e Janic han translatà l’original englais en vallader, confermond qua tras il ferm potenzial popmusical da l’Engiadina Bassa.

Realisaziun

Musica e text: Andrea Frey
Text rumantsch: Elias Tsoutsaios, Janic Sarott
Producziun originala: Studio Hard, Winterthur
Producziun finala: Manfred Zazzi, Aquarium, Turitg
Ghitarras, piano, chant: Andrea Frey
Ghitarras, bass, chant: Elias Tsoutsaios
Battaria, battamauns, percussiun, chant: Janic Sarott

Text da la chanzun: Jamie

Ve char no giain davent
Davent da qua
M'algord cha Jamie ha dit
Quella jada

Nouv mat plü bel sco eu pigliess meis lö, eu füss sulet
Be cun meis cour in man füss sco povret yeah

Jamie ingiona e piglia meis cour our dal muond
Dal muond
Ma Jamie po far cheu rest qua e nu vegn perdond
Perdond

Previsibla e speciala precis quai cha tü voust
Usche naíva e chara cun duos peis sül fuond

Pudain ir in mincha lö, dalönch davent o be dastrusch
Ma ingio precis nu disch mai

Jamie ingiona e piglia meis cour our dal muond
Dal muond
Ma Jamie po far cheu rest qua e nu vegn perdond
Perdond

Jamie eu d'eira pront da dar a tai meis nom
Scha tü am vessast douvra füss eu stat teis hom
Sast tü Jamie ch'eu n'ha differents sentimaints
Jamie di a mai che fetscha cun quist mumaint

Jamie ingiona e piglia meis cour our dal muond
Ma Jamie po far cheu rest qua e nu vegn perdond
Jamie ingiona e piglia meis cour our dal muond
Ma la nu da inavo quai chi tocca i'l corp

Jamie fa il bain
Fa il bain sta davent
Davent da mai