Siglir tar il cuntegn
cuntegn

Top Pop Rumantsch Top Pop Rumantsch cun Tartaruga

12. Top Pop Rumantsch cun Tartaruga e la chanzun «Tgei?».

Purtret da Tartaruga che suna ghitarra.
Legenda: Thomas Cathomen alias Tartaruga. mad

Tartaruga

Tartaruga è il num d'art da Thomas Cathomen. Il chantautur è cumparì l'onn 1999 cun la ballada «Fretgs dultschs» ed ha lura fatg furori trais onns pli tard cun ses prim album «Tartarugapop». La stad 2005 è Thomas returnà en il Mexico, il pajais da sia uffanza. Sper la lavur da scolast e la famiglia chatta el vinavant temp per sia passiun; per la cumpilaziun rumantscha «accent» ha el furnì il toc «Dedicaziun».

La chanzun cun il titel «Tgei?» ha fatg in grond viadi. En plirs grads. L'emprima skizza da la chanzun «Tgei?» ha Benedetto Vigne cumponì avant bunamain 30 onns. Jau pensava ad ina ballada dal tip «Nights In White Satin» declera il coordinatur dal project Top Pop Rumantsch. La primavaira passada ha el scrit in nov text e preschentà la truvaglia al producent Manfred Zazzi. Quel ha proponì ina battaria irregulara che rumpa il valzer original da la chanzun – e ch'illustrescha ultra da quai «la confusiun en la battida da miu cor». Ed en l'arranschament ha el mess ina tempra da western. Da principi eri cler da surdar il chant a Thomas «Tartaruga» Cathomen. Ina detga sfida, damai ch'il chantautur rumantsch viva en il Mexico. Ma nagin problem en il temp da l'internet: Manfred ha tramess vi la basa instrumentala per e-mail, e Thomas ha chantà vi là en in studio la melodia ed er gist agiuntà ils chors tenor ses gust.

Realisaziun

Interpret: Tartaruga
Text e musica: Benedetto Vigne
Arranschaments & producziun: Manfred Zazzi & Danny Hertach
Battaria: Muso Stamm
Bass: Danny Hertach
Ghitarras: Jean-Pierre von Dach

Text da la chanzun: Tgei?

Tgei eisi tgei che muenta mei
Tgei eisi tgei che envida mei
Tgei eisi tgei che cudezza mei
Tgei eisi tgei che pretenda mei

Jeu hai damondas che vegnan a mi
Jeu hai marveglias sch'ei dat enzatgi
Che sa rispunder
Che di a mi danunder
Tut quei che fa confunder
La battida da miu cor

Tgei eisi tgei che tarlischa cheu
Tgei eisi tgei che resuna cheu

Quei ein misteris che vegnan e van
Quei ein ils legns dalla veta che fan
A mi premura
Scumbeglian sut e sura
E fieran or da tura
La battida da miu cor