Siglir tar il cuntegn

Header

Portrait da Marie Louise Werth.
Legenda: Marie Louise Werth. mad
cuntegn

Top Pop Rumantsch Top Pop Rumantsch cun Marie Louise Werth

30. Top Pop Rumantsch cun Marie Louise Werth e la chanzun «Quei utschi».

Per la 30avla ediziun dal Top Pop Rumantsch sa mida Marie Louise Werth miraculusamain en «Quei utschi».

Marie Louise Werth

Top Pop Rumantsch, la oramai renumada retscha popmusicala dal Radio Rumantsch, celebrescha sia 30avla ediziun. Per onurar quest event spezial han ils responsabels da la retscha tschernì la vusch straordinaria da Marie Louise Werth, dapi onns la figura principala dals Furbaz. Ina chantanta e musicista ch’ins na sto ni preschentar ni promover. Cun sia vasta experientscha che tanscha da la chanzun populara sur il schlagher enfin tar il jazz avess Milly il potenzial per ina cumparsa furiusa. Tant dapli surprenda ella qua auditur ed auditura cun ina chanzun zunt fina, zunt filigrana. In utschè inamurà è il protagonist da sia cumposiziun. Sur ina textura decenta da ghitarra acustica e clavazin sa mova la vusch virtuusa, oszillond tranter chant virginal ed intunaziun bluesica-fimentada, glischnond bainduras ad aut sco ina lodola en il blau dal firmament.

Realisaziun
Musica, text, chant & clavazin: Marie Louise Werth
Ghitarra: Jean-Pierre von Dach
Giun: Michael Chilewsky
Cello: Daniel Pezzotti
Battaria: Rolf Caflisch
Producziun & Mix: Manfred Zazzi

Text da la chanzun: Quei utschi
Jeu less sgular tras l‘aria fina
Schar mes calzers isai sin cruna
Sesalzar cun pial gaglina
Mei schar purtar il vent tier tei
Nua quei ei adina

Less prender part a tia veta
Guder cun tei quei che ha valeta
Schar dar il mund cumpleins dad oz
Semiar cun tei
Da di e notg

Oh, co quei fuss bi
D’astgar esser quei utschi
Oh, co quei fuss bi
D’esser leu sper tei quei utschi

Less sesfundrar en tes egls blaus
Ed enconuscher ils tes quitaus
Udir dapli tia vusch carina
Cantar cun tei canzuns
Tgei canzuns era adina

Oh, co quei fuss bi
D’astgar esser quei utschi
Oh, co quei fuss bi
D’esser leu sper tei quei utschi

Strusch ein mes patratgs tier tei
Sentel questa febra en mei