Top Pop Rumantsch cun Luis Coray e Pascal Gamboni

42. Top Pop Rumantsch è ina collavuraziun tranter duas generaziuns da chantauturs sursilvans – Luis Coray e Pascal Gamboni chantan «sen baun».

«sen baun» cun lur patratgs en l'ester.

Legenda da maletgs: Pensiv «sen baun». RTR, F. Tuor

Luis Coray e Pascal Gamboni

Luis Coray, artist universal, performader, pictur e musicist, è stà in dals emprims chantauturs rumantschs sursilvans, activ dapi ils emprims onns settanta. Ma el è er in trubadur cun ina tempra bluesica detg sfranada ed anarchica, greva da metter en ils mastrins da producziuns luxuriusas. Ch’el vegn tuttina da furnir uss, cun ses passa 60 onns, in Top Pop Rumantsch, quai engrazia Luis Coray ad ina collavuraziun cun il collega junior tuatschin Pascal Gamboni, quests dis qua il chantautur rumantsch il pli discutà.

Ensemen han els elavurà la chanzun «sen baun», ina veglia cumposiziun da Coray, dond a quella in ritmus poetic alert e persvadent. Per la transposiziun musicala definitiva ha dentant procurà il musicist vallesan Michael Gertschen, in producent ch’ha gia lavurà cun divers renumads artists svizzers. Gertschen ha rinforzà il blues basic da la chanzun, manond quella la finala en ina erupziun da jazz à la New Orleans. Ed el ha er guardà che Gamboni e Coray, dus chantadurs uschè ineguals, chattian ina vusch communabla, en quel 42avel Top Pop Rumantsch, che recloma unisono ina storta: «O pren toch giu tes peis uss dal clavazin!»

Laschar ir video «Luis Coray e Pascal Gamboni sin vista tar RTR»

Luis Coray e Pascal Gamboni sin vista tar RTR

9:37 min, dals 2.3.2016

Live en il studio dal Radio Rumantsch

Per la primaudiziun da la chanzun han Luis Coray e Pascal Gamboni fatg ina visita a noss moderatur da radio Tobia Valär. L'entir discurs qua era sco video.