Siglir tar il cuntegn

Header

Portrait da Cha da Fö alias Roland Vögtli.
Legenda: Cha da Fö alias Roland Vögtli. mad
cuntegn

Top Pop Rumantsch Top Pop Rumantsch cun Cha da Fö

28. Top Pop Rumantsch cun Cha da Fö e la chanzun «Cunfin».

«L’increschantüm quella sa spettar» - ina frasa clav en il nov Top Pop Rumantsch, preschentà dal trubadur ladin Cha da Fö alias Roland Vögtli. Pelvair flada questa chanzun pauc da la chara lingua e bler dal vest selvadi imaginar. Igl è in blues basic e rudimentar, cun in accent american ed ina ghitarra che planscha dal plaschair. Cumponì en «chadafös» tranter Scuol, Cuira e Minca, projectescha il toc in «cunfin» ristgadamain surpassà, laschond lunsch davos sai betg mo il solit intschess da chatscha e l’encreschadetgna proverbiala, mabain er bleras aventuras musicalas - sco per exempel la gruppa da rock tempriva AndaRojo. «La fin da la chanzun è averta ed jau ma sent sco en in nov cumenzament», commentescha Cha da Fö sia bravura.

Roland Vögtli

Roland Vögtli (30) è naschì e creschì si a Scuol. Dapi trais onns lavura el sco redactur da musica tar RTR Radiotelevisiun Svizra Rumantscha a Cuira. Sia activitad da musicist reparta el sin dus binaris, d’ina ina vart il rockadur da vaglia, actualmain cun il quartet sonic NAU, da l’autra vart numnadamain il chantautur cun il num d’art Cha da Fö, preschent proximamain er en la turnea trans-rumantscha «chant au tour».

Realisaziun

Musica e text, chant: Cha da Fö
Producziun: Manfred Zazzi e Cha da Fö
Ghitarra: Mario Capitanio
Bass: Dany Hertach
Battaria: Rolf Caflisch

Text da la chanzun: Cunfin

i’m es i sü üna glüm
il vaincher es crodà
inchün ha trat il gialin
il tun m’ha be blessà
deliberada es la bes-cha
i nu’m interessa che chi vain quintà
eu fetsch viadi sur cunfin
ed eu nu sa sch’eu dess tuornar

ingio es il cunfin?
in meis cheu in meis cour eu nu sa!
ingio es üna fin?
in meis cheu in meis cour quai nu da!
perche ün cunfin?
quel ans strangla la libertà!
ingio es il cunfin?

a l’orizont nascha il sulai
eu sun cuntaint e plain richezza
eu n’ha gust da far viadi
l’increschantüm quella sa spettar
eu nu’m saint plü co ün giat
chi’d es serrà in abitaziun
e chi vess jent dad ir a chatscha
e manar a chasa il butin
deliberada es la bes-cha
i nu’m interessa che chi vain quintà
eu fetsch viadi sur cunfin
ed eu nu sa sch’eu dess tuornar!