Siglir tar il cuntegn
cuntegn

Top Pop Rumantsch Top Pop Rumantsch cun Brass'n'Jazz ed Ursina Giger

29. Top Pop Rumantsch cun ils Brass'n'Jazz ed Ursina Giger e la chanzun «Di per di».

La gruppa Brass'n'Jazz ed Ursina Giger da surengiu.
Legenda: Brass'n'Jazz ed Ursina Giger. mad

Il 29avel Top Pop Rumantsch è ina collavuraziun straordinaria tranter musica da flad e gruppa da jazz: ils Brass’n’Jazz ed Ursina Giger interpreteschan «Di per di».

Il di cumenza cun buna luna ed in satg chaussas da far. Ma la protagonista stauscha avant sai tut ils pensums, fa enstagl chalenders e guarda viador en il mund. «Oz ei semplamein buc miu di» resumescha ella vers la fin da la chanzun, la chanzun che porta il titel «Di per di». Ma la ligerezza da ses chant ed il schlantsch dals sturs davostiers laschan sminar ch’in tal di nunproductiv na saja betg il mender che po capitar. Anzi, igl è pura primavaira quai che quest 29avel Top Pop Rumantsch derasa, cun ses swing universal.

Brass'n'Jazz

«Brass’n’Jazz» sa numna questa collavuraziun straordinaria da la Musica Vignogn cun la gruppa da jazz Clamür e la chantanta Ursina Giger.

La Musica Vignogn exista dapi passa 90 onns, cumpiglia actualmain 32 chaus e vegn oz dirigida da Remo Derungs, reparader d’instruments e fervent fan da swing. Il quartet Clamür, furmà dal pianist Christian Müller, dal saxofonist Clau Maissen, dal bassist Lucas Schwarz e dal batterist Andriu Maissen, celebrescha gist quest onn ses 10avel anniversari e guarda enavos sin ina rotscha projects da tuts geners. Ursina Giger, creschida si a Mustér e mumentan sin via da finir la scola da jazz a Lucerna, chanta a la testa da numerusas gruppas, tranter quellas l’ensemble da worldmusic Quintinò e sia atgna band «Ursina».

Realisaziun

Il pianist Christian Müller ha skizzà la melodia, Ursina Giger ha scrit il text ed il arranschader professiunal Bela Balint ha procurà per il rest, dond al toc ina tempra da swing modern à la Michael Bublé. La registraziun basica ha gì lieu ina dumengia da fin mars en il renumà studio Powerplay a Maur, il chant è vegnì agiuntà a l’Aquarium Turitg intgins dis pli tard, tut sut la reschia da Manfred Zazzi.

Text da la chanzun: Di per di

Sun oz levada ad uras
perquei ch’jeu hai aunc massa caussas da liquidar
entochen sera
per saver far si buna tschera.

Suenter il solver, sun sepinada,
hai priu pupi ed in rispli per ponderar
cun tgei ch’jeu duei entscheiver
co neziar il di e far il meglier.

Enstagl da far quei che fuss impurtont
fetg jeu gliestas e mirel viado el mund,
e smarvegliel co il temps varga,
senza ch’jeu vegnel in pass vinavon.

Sun aunc adina, sin baun cuschina
e spetgel sin in segn da su
che port’inspiraziun,
mo nuot schabegia,
jeu sedamondel sche quei gartegia.

Enstagl da far quei che stat oz sil plan
lege’jeu gasett’e schubregiel la cruna el bogn
e smarvegliel co il temps varga,
senza ch’jeu vegnel in pass vinavon.

Quei ch'jeu vegnel oz buc da far
stausch jeu semplamein sin damaun cul patertgar
ch'ei mondi lu bia meglier,
senza luvrar memia bia ella ga.

Pertgei che oz ei semplamein buc miu di
e tut quei ch’jeu entscheivel cun in surrir
vul buc finir
e strapazescha mia gnarva, tochen ch’jeu dundel si.

Sun oz levada ad uras
mo forsa fussi stau da durmir entochen miezdi
pertgei gidau hai buc massa
e la buna luna ei uss vargada.

Enstagl da far enzatgei che fa senn
ses’jeu en stiva e mes patratgs lunsch naven
e smarvegliel co il temps varga,
senza ch’jeu vegnel in pass vinavon.

Quei ch'jeu vegnel oz buc da far
stausch jeu semplamein sin damaun cul patertgar
ch'ei mondi lu bia meglier,
senza luvrar memia bia ella ga.

Pertgei che oz ei semplamein buc miu di
e tut quei ch’jeu entscheivel cun in surrir
vul buc finir
e strapazescha mia gnarva, tochen ch’jeu dundel si.