Siglir tar il cuntegn
cuntegn

Top Pop Rumantsch Top Pop Rumantsch cun Astrid Alexandre

32. Top Pop Rumantsch - in suffel da Paris. Astrid Alexandre cun la chanzun «Ti»

Portrait d'Astrid Alexandre.
Legenda: Astrid Alexandre. mad

Arias ligeras per ils megliers amis, quai è il messadi dal 32avel Top Pop Rumantsch.

Astrid Alexandre

Astrid Alexandre, figlia dad in immigrant beltg, è creschida si tranter il Piz Mundaun e las melodias da Tumasch Dolf. Ma sch’ins dumonda ella tge ch’è sia musica preferida, lura menziuna la viscla Sursilvana magari gugent il num da la chanteuse franzosa Barbara. E tant sco che la giuvna chantadura rumantscha ha gì scolaziun classica da vusch e clavazin, tant sa lascha ella er fascinar da la tribuna ligera da cabaret e tingeltangel, u dals pitschens teaters musicals da Paris, nua che Astrid ha concertà ils ultims onns savens ensemen cun ses partenari artistic Mario Pacchioli.

In pau da quella atmosfera dal café dansant cula uss er en la chanzun che la chantautura ha proponì sco Top Pop al Radio Rumantsch, la chanzun cun il simpel titel «Ti». Sur ina ghitarra da swing parta Alexandre immediat cun in bel «scat» improvisà, per lura laschar suandar quai ch’ella sezza numna «ina decleraziun d’amur als megliers amis», enramada dals tuns amiaivels dad ina celesta.

Realisaziun

Musica & text: Astrid Alexandre
Battaria: Rolf Caflisch
Ghitarra: Jean-Pierre VonDach
Cuntrabass: Michael Chilevsky
Accordeon: Goran Kovacevic
Celesta, hammond & chant: Astrid Alexandre
Progammings, percussiun e producziun: Manfred Zazzi, Aquarium Turitg

Text da la chanzun: Ti

ti eis miu «jeu» cu jeu anflel buca pli il miu
ti vesas larmas ch’jeu muossel a negin
ti eis la mar ed enconuschas buc cunfins
ti eis la pasch ch’jeu enquerel en mi’affonza
speronza stas aunc ditg cun mei...

dumengias da plievgia en spir depressiun
il start gliendisdis endamaun allas sis
far uorden en stiva gest suenter la fiasta
saver rir da caussas che negin sa capir
tut, tut, gie liditut ei pli bi cun tei

ti eis la forza ch’jeu drovel per crescher
ti eis canzuns che jeu audel nescher
ti eis l’oasa cu jeu sun sepiarsa
ti eis la pasch ch’jeu enquerel en mi’affonza
speronz’has aunc pazienzia cun mei...

dumengias da plievgia en spir depressiun
il start gliendisdis endamaun allas sis
far uorden en stiva gest suenter la fiasta
saver rir da caussas che negin sa capir
tut, tut, gie liditut ei pli bi cun tei

ti eis la fin da mintga soli’entschatta
en tut mes quens eis ti la suletta constanta
ti eis il tun sin il qual jeu vi restar
e ti eis la pasch ch’jeu enquerel en mi’affonza
tgei bi che ti eis aunc cheu cun mei!

dumengias da plievgia en spir depressiun
il start gliendisdis endamaun allas sis
far uorden en stiva gest suenter la fiasta
saver rir da caussas che negin sa capir
tut, tut, gie liditut ei pli bi cun tei