Dapi sia uffanza ha Saskia ina stinada migrena, da tala guisa ch’ella sa senta gia famigliara cun la dolur: «Bun de mies mal» – cun quel salid bunamain ironic cumenza la giuvna da strusch 16 onns il novischem Top Pop Rumantsch. E quel monolog cun la malsogna cuntinuescha tras l’entira chanzun, demussond la ferma veglia da cumbatter cun tut «mies cor» ch’ha «fatg tras schi bler», enfin che cumparan vers la fin intgins radis da sulegl. L’intimitad persunala da la chanzun empermettia in sentiment pli credibel, manegia la chantadura.
Far curaschi
La chantadura ch’ha cumenzà questa stad l’emprendissadi da florista a Cuira spera da cuntanscher blers cors cun sia chanzun, da magari «far curasch ad otras tgi òn er betg adegna schi bagn».
Emprims pass musicals
E propi, l’istorgia è magari sombra, ma la vusch è fina e vibranta, ella regorda a la tempra d’ina veritabla staila. Crudada en ureglia è la scolara gia avant passa dus onns en il conturn da Salouf, sia vischnanca nativa. Ella ha entschet cun pitschnas cumparsas sin festas, ha bain svelt ristgà da concertar sin tribunas ordvart Surses ed ha perfin participà al pitschen premi walo. Adina s’accumpagnond cun la ghitarra u magari er cun playbacks electronics, chanta Saskia Demarmels però be represas da hits anglofons, chanzuns che tanschan d’Ed Sheeran enfin tar Beyoncé.
Emprima chanzun rumantscha
Sia unica emprova rumantscha è stada fin a qua ina versiun surmirana dal «Hallelujah» da Leonard Cohen, ina translaziun d’in collega veteran chantautur. Uss suonda damai l’emprima «atgna» chanzun rumantscha da Saskia, «Mies cor». Per il text ha ella survegnì agid da Giganto e Mattiu Defuns, la musica han cumponì Sandro Dietrich e Lou Zarra dal studio Klangstark.