Il 37avel Top Pop Rumantsch preschenta cun Paul Nay ina pitga da la chanzun moderna rumantscha.
Paul Nay
Il chantautur sursilvan Paul Nay, ch’ans ha surprais avant 5 onns cun in album producì aut-professiunalmain en l’America, s’annunzia enavos cun ina nova pitschna perla. Igl è ina chanzun che stat spezialmain a cor al chantadur, ed il titel tradescha er pertge: «Schi lunsch naven».
Paul Nay sa regorda da meds populars, citond explizit la veglia chanzun da Tumasch Dolf tenor la poesia da Schamun Mani. Ed el cunfronta aposta visiuns dal passà cun il mund modern, nua che viagiar è daventà ina tramagliada: «Schi lunsch naven sai oz sgular.»
La melodia là tiers è tipica Nay: bufatga a l’entschatta, flurenta entamez e vairamain
opulenta vers la fin. D’udir a partir dad dal 16-09-2014 sin las undas dal Radio
Rumantsch.
Realisaziun
Cumposiziun e text: Paul Nay
Producziun: Paaul Nay e Manfred Zazzi
Ghitarras: Angelo Zuterni
Battaria: Rolf Caflisch
Bass: Dave Maeder
Chors: Christina Köb
Text da la chanzun: Schi lunsch naven
Da pign, sco affon
accumpigniavas ti mei
pura melanconia
derasavas sur mei
oz suenter tons onns ei ton semidau
tia melodia vai adatau
ir oz el lontan tut auter che lu
oz dat miu cor auter sinzu
schi lunsch naven sai oz sgular
e gia damaun puspei turnar
vi star quiets er vinavon
ei dat egl jester, egl jester ton
ei dat egl jester ton
ch’ins anfla bu a casa
Da tiu temps mavas ti sin viadi
cun cavagl e postigliun
jeu mon en quei mument oz
cun aviun entuorn il mund
il mund ei aschi datiers oz
mo tutina aschi lontans
igl jester resta jester
tgei gidan aeroplans
schi lunsch naven sai oz sgular
e gia damaun puspei turnar
vi star quiets er vinavon
ei dat egl jester, egl jester ton
ei dat egl jester ton
mo nuot mi plai sco sche savens
jeu pos udir er cheu ils zenns
els tunan grad sco leu tier tei
els tunan grad sco cheu tier mei
els tunan sco da casa
els tunan sco da casa