Il 36avel Top Pop Rumantsch ans lascha redudir l'anteriur Passiunai Curdin Brugger da Sedrun.
Curdin Brugger
Avant var 15 onns fascheva Curdin Brugger anc part dals Passiunai - la gruppa populara tuatschina. Cun l'emigraziun da Pascal Gamboni en l'Engalterra ha però quest chapitel da rock rumantsch prendì ina fin.
Curdin s'ha lura deditgà en emprima lingia a famiglia e fatschenta, surpigliond a Sedrun il hotel dals geniturs. Ma la musica na l'ha betg laschà d'ina vart. Sco fan da la ghitarra acustica ha el perfecziunà sin l'instrument tecnicas da finger-picking ed emprendì a sunar cun accordaziuns avertas. Scrivend magari er qua u là ina nova chanzun.
Ina da questas preschenta Curdin Brugger sco 36avel Top Pop Rumantsch: in pitschen folksong cun melodia simpla ed in bel refrain tschivlà a la moda da Bobby McFerrin. En quest grà tunan er messadi e titel da la chanzun: «Fidonza». Il bass ha dal reminent sunà Pascal Gamboni, chaschunond uschia ina pitschna reunificaziun dals Passiunai.
Realisaziun
Chant, ghitarra, tschivel: Curdin Brugger
Bass, ghitarra: Pascal Gamboni
Ghitarra electrica: Severin Brugger
Battaria: Rolf Caflisch
Producziun: Manfred Zazzi
Text da la chanzun: Fidonza
té stos mo vai fidonza.
tut vegn bien, sche té mo craias.
astgas vai buna speronza
sén quella via tga té ais.
ais engrazieivels per tut quai, tga té as.
ais cuntians da tut quai, tga té sas.
té stos mo vai pazienzia.
tiams vargia, tiams vegn a mussar.
fo schi bien, fo begi'ordlunder ina scienzia.
libers sas tia via caminar.
ais engrazieivels per tut quai, tga té as.
ais cuntians da tut quai, tga té sas.