Il Top Pop Rumantsch entra en ina nova stagiun. Eremit alias Luca Besio da Zernez chanta «La vita tuoch’a tai».
Luca Besio
Luca Besio ha cumenzà a far musica sunond melodias da Nadal sin in clavazin da tramagl. Ma igl è lura la battaria ch’ha sveglià tar l’adolescent zernezin la vaira passiun per la musica, e passond tras la solita band da scola ha el lura battì in’ urella il tact tar ils giuvens Skywards da Schlarigna. Cun scuvrir la finala la ghitarra ha el era survegnì gust da crear atgnas chanzuns. Il 2001, cun 20 onns, è Luca partì per la Bassa ed è sa chasà en l’Argovia. Ma el ha purtà cun sai l’anim d’ina ritga tradiziun ladina che tanscha da Paulin Nuotclà sur ils Bulais enfin tar Cha da Fö: Sias cumposiziuns, fixadas oramai sin il computer chasan, èn chantadas per gronda part per rumantsch. Ed il zambregiader solitari ha er gist chattà ses num d’art adequat: Eremit. Dacurt ha il Radio Rumantsch scuvert las chanzuns d’Eremit sin la plattafurma Mx3 ed ha suggerì al musicist da participar a la retscha dal Top Pop Rumantsch. E Luca Besio ha pront scrit ina nova chanzun ad hoc, dond a quella sia preferida tonalitad melanconica ed in tema bainvis en la retscha: «La vita tuoch’a tai». Qua resta be anc d’agiuntar: La musica er!
Realisaziun
Chant, musica e text: Eremit (Luca Besio)
Battaria: Roger Hintermann
Bass: Danny Hertach
Cello: Simon Würgler
Ghitarra, loops e programs: Philipp Erdin
Tastas: Stefan Hächler
Producziun, mix e master: Philipp Erdin, Sonarsound, Turitg
Text da la chanzun: «La vita tuoch'a tai»
mincha sforz cha tü hast fat fin uossa
ha resultà in ün progress
il cumbat ch'hast gnü per tia chossa
ha resultà in ün success
perche vess eu da perder
sch'eu dun tuot quai ch'eu poss
perche stess avair temma
da far qualchossa foss
chatta la fiduzia
cha portast aint in tai
na dar sü la spranza
la vita tuoch'a tai
na dar sü,
na dar sü la spranza
La vita tuoch'a tai
tuot quellas voutas cha hast gnü ün dubi
est eir crodà sül nas
mincha vouta ch'hast pers il curaschi
hast eir giü pers teis pas
perche vess eu da perder
sch'eu dun tuot quai ch'eu poss
perche stess avair temma
da far qualchossa foss
chatta la fiduzia
cha portast aint in tai
na dar sü la spranza
la vita tuoch'a tai
na dar sü,
na dar sü la spranza
la vita tuoch'a tai
