La damaun ha ella anc fatg in examen da matura, in pèr uras pli tard ha la chantadura da 19 onns da Son Gagl Joya Marleen gia tegnì en maun ses emprims Swiss Music Awards sco «Best Female Act». A partir da la stad possia ella finalmain far musica, ha ditg l'artista che ha era gudagnà en la categoria SRF 3 «Best talent», nominà eran era Kings Elliot e Priya Ragu.
E per finir l'occurenza è ella lura aunc vegnida clamada ina terza giada sin tribuna. Era en la categoria «Best Hit» ha la chantadura gudagnà in crap da sulada – quai la furma dal SMA.
Jau ma sent enorm onurada. Absolut krass, tge ch'è capità oz.
La primavaira 2020 ha Joya Marleen gì l'emprim success cun ses song «Nightmare» – ussa è ella puspè vegnida undrada per il titel.
Gronda onur per Kunz
La 15avla ediziun dals SMA è stada sut l'ensaina da las newcomras e dals newcomers. Il musicist basilais Zian ha survegnì il premi sco «Best crushing newcomer». El è dentant era stà nominà sco «Best Mal Act», quai ch'è ina specialitad per in artist ch'ha publitgà il schaner 2022 ses album da debut «Burden».
En questa sparta ha dentant gudagnà ina veglia lieur: Il musicist lucernais Kunz, ch'ha era gudagnà ina trofea per il meglier album, «Mai». Gia il 2020 è el vegnì premià per ses quart album da studi «Förschi», 2018 e 2020 è el stà il meglier artist masculin.
Mument emoziunal
Sco meglra gruppa è vegnida undrada il trio Brandão Faber Hunger che consista da Dino Brandão, da Sophie Hunger e da Faber. Ils trais n'eran bain betg preschents, ma Dino Brandão ha engrazià via messadi da video per il premi. El sa sentia fitg bain en la scena da musica svizra, ha el ditg e ha ludà quella sco «fitg divers».
Il crap da sulada per il «Best Act Romandie» è ì a la chantadura ed a la producenta Danitsa. L'«artist Award» ch'è destinà d'artistas e d'artists ha la band da l'Argovia MNEVIS retschavì.
Endo Anaconda, il chantadur defunct da la band «Stiller Has» è vegnì undrà postum cun il «Tribute Award». En in dals numerus clips da video ch'èn vegnids mussads d'el, ha l'artist ditg ch'el haja adina fatg musica «per ch'ils umans na sa sentian betg anc pli malsauns ch'els sajan gia». Ils temas centrals en ses texts eran l'amur e la mort:
Tut auter n'è betg interessant.