Siglir tar il cuntegn

Sin il viv – 25 onns Impuls Impuls «live» a Savognin

Flyer da l'occurenza
Legenda: RTR

«Sin il viv!» è la turnea da lecturas per festivar il giubileum da 25 onns da l’emissiun «Impuls» da Radiotelevisiun Svizra Rumantscha. Suenter las emprimas dus lecturas a Sedrun ed a Turitg, sa ferma «Sin il viv!» ussa en la halla da construcziun da la lainaria Uffer SA a Savognin. Là prelegian las auturas Rina Steier, Dominique Dosch e Zegna Pittet-Dosch sco era l’autur Göri Klainguti, vegls ma era novissims Impuls, scrits aposta per «Sin il viv!» a Savognin, che tractan tranter auter dal temp, d’aissas e dal ir per la bostga.

La pli giuvna autura da quest quartet empermettent è Dominique Dosch (*1995) da Tinizong. Gia cun 18 onns ha ella pudì publitgar ses emprim cudesch «Sindoria», in roman da fantasia, tar la Chasa Editura Rumantscha. Dapi lura ha ella publitgà surtut prosa curta, ch’ella scriva era per Impuls cun bler entusiassem e gust d’experimentar. Dapi in onn fa la scolasta e schurnalista Zegna Pittet-Dosch (*1980) da Cunter, ils emprims pass litterars en publicitad scrivend Impuls. Ses Impuls raquintan cun blera autoironia istorgias, che tematiseschan co che l’atgna percepziun sa mida culs onns ed en passond era co che la regiun dal Surmeir è sa midada. Gia dapi 1998 pon ins udir texts da Rina Steier (*1940) al Radio Rumantsch. L’autura da Savognin è stada engaschada en divers uffizis politics e la promoziun da dunnas, ch'è adina stada impurtanta per ella, è er adina puspè in tema en ses Impuls. Anc pli ditg, numnadamain dapi l’entschatta da l’emissiun l’onn 1993, scriva il Puter Göri Klainguti Impuls. El ha publitgà divers cudeschs e texts en gasettas, revistas ed antologias. Ses texts èn raffinads e tschegnan adina cun umur sin pitschnas e grondas absurditads da nossa lingua e da noss mintga di.