Per l’emprema dumengia d’advent vi jeu descriver a Vus in maletg che va per mei bein a prau cun quellas jamnas avon Nadal. Sin quei maletg ves’ins in grond muossavia cun scret si «cletg». Ina massa glieud cuora en la direcziun indicada. Tuts ein en prescha per contonscher il cletg. Certins fan plitost tschera brutta, probabel perquei che la via ei per part stentusa. Ina dunna emprova da vegnir vinavon cun tuschar auters ord via. Ed in um mira sill’ura, ord tema da munchentar enzatgei.
Sper quella massa glieud sesanfla in mir, e sin quel schai in giuvenot. El fa buca stem da quels che cuoran sperasvi. El schai tut ruasseivel leu sin il mir, cun in surrir ed ina flura en bucca, e mira si viers tschiel. Tgisà tgei che quei giuven patratga ni siemia?
Da temps en temps fa ei bein da ponderar, co nossa via tier il cletg savess ir vinavon e tgei novas finamiras che sedattan.
Il temps d’advent, il temps da sepreparar per Nadal, colligia per mei omisduas parts da quei maletg. Nus enconuschein quels muments hectics, cu ei sto ir dabot. Dar damogn a tut ils termins, cuntentar ils interess dils affons, ademplir obligaziuns, e lu stuess ins aunc far sport, ir en iert ed auter. Cun s’enschignar e seduvrar han gia biars anflau lur cletg. Mo ei sa era schabegiar, che nus arrivein lu buc el liug che nus vevan giavischau. Quei sa esser frustront, cunzun sch’ins ha ditg e liung ina gronda finamira e sa tuttina buca contonscher quella.
Jeu sesentel mintgaton frustrada, sche jeu mirel, tgei che succeda sin nies mund. Las uiaras peglian buca fin, projects per schurmegiar nies ambient s’avonzan pli plaun ch’in schnec e jeu sedamondel, tgei che nus savein insumma aunc spitgar. E tgei sai jeu persunalmein spitgar?
Bien ch’ei dat aunc in’autra vesta. Quella dil giuvenot che schai sil mir. Igl advent cun ses bials rituals porscha era muments pli ruasseivels. Nus savein far pausas e mirar si viers tschiel. Quei ha da far nuot cun smarschanar. Tals muments, cu ins lai sgular ils patratgs, san esser fetg creativs. Da temps en temps fa ei bein da ponderar, co nossa via tier il cletg savess ir vinavon e tgei novas finamiras che sedattan. La via en direcziun da Nadal ei quella, nua ch’ins astga spitgar bia. Sch’igl ei lu bien da cuorer, ni meglier da prender pli pacific, quei sto mintgin mirar sez!