Fand strada tras la Sardegna m’ha dat in ögl ün muossavia vers üna baselgia, dedichada a la «madonna chi scioglie i nodi», la madonna chi schoglia ils nufs.
Chara Maria, n’haja pensà, tü varast da far, scha tü voust schoglier ils nufs chi existan, ils nufs aint in no, ils nufs tanter da no, gnanca da pensar als nufs illa politica, a las guerras cun lur nufs e quels i’l svilup da nos planet.
Chara Maria, n’haja pensà, tü varast da far, scha tü voust schoglier ils nufs chi existan, ils nufs aint in no, ils nufs tanter da no, gnanca da pensar als nufs illa politica, a las guerras cun lur nufs e quels i’l svilup da nos planet.
Chara Maria, eir tü hast fat tras ün da quels nufs cur cha teis figl es parti da chasa, vo eschat its per til manar inavo e cur ch’el ha declarà cha tuot quels chi til sieuan, sajan per el sia famiglia, sias sours e seis frars.
Chara Maria, e lura ils nufs cha tü hast gnü aint in tai, cur cha tü hast stuvü verer co cha sia via es ida vers la crusch e tü d’eirast là, til hast vis e nun hast pudü far nöglia oter co patir cun el.
Ed uossa – quista baselgia muossa quai – spettan e spereschan ils umans cha tü ans güdast a schoglier tuot noss nufs. Hai, tü nu varast da plandscher da mancanza da lavur.
Guarda Maria, il fat cha no spettain e sperain quai, muossa tantüna cha no realisain quists nufs, cha quels ans fan mal, cha no patin da quels.
E sast, chara Maria, no pudessan ans unir suot il pled cha ün dals apostels, tü til varast amo cugnuschü, ha scrit ün pêr ans davo la vita da teis figl: Portai l’ün il fasch da l’oter ed accumpli uschè la ledscha da Cristus. – In separaziun nu’s riva nempe da schoglier nufs, in cumünanza almain da tils portar e forsa eir da schoglier.