Ussa va ei buca pli ditg e per ils biars van las vacanzas da stad a fin. Aschia sperel jeu che Vus, caras lecturas e cars lecturs, hagies era giu in pèr dis liber ed hagies gudiu igl aschinumnau «dolce far niente».
Mo veis Vus saviu ch’era Jesus ha fatg vacanzas? Enconuschis Vus quella historia nua che Jesus ha duvrau in pèr dis liber, ha pachetau las cofras ed ei ius en vacanzas? Sche buc, lu stueis era buca haver ina schliata cunscienzia. Quella historia stat buc ella Bibla, mobein en in cudisch d’affons da Nicholas Allan.
Allan raquenta co Jesus ha luvrau di e notg per far il mund empau megliers: el ha fatg miraclas, el ha medegau ils malsauns ed ha raquintau als carstgauns da Diu. Mo ina damaun ei Jesus levaus ed era lu staunchels da far tudi bunas ovras. El era aschi staunchels ch’el saveva buca pli far endretg miraclas ed era neginas historias vegnevan endamen ad el ch’el saveva raquintar als carstgauns. Sinaquei ei Jesus lu ius tier il miedi e lez ha cussegliau ad el da far vacanzas.
Mo sche ti eis cuntents cun tetez, lu sas ti far cuntents ils auters.
E quei fa Jesus lu era: sut ina palma fa el picnic, va lu suenter a senudar en in lag ed el gauda il «dolce far niente… Mo la sera ha Jesus lu giu ina schliata cunscienzia, perquei ch’el era buca staus productivs ed hagi buca fatg megliers il mund. El enquera sinaquei il discuors cun Diu e spetga ch’el fetschi reproschas ad el. Mo anzi, Diu muossa ad el, tgei ch’ei schabegiau tut duront quei di da vacanzas: leu nua ch’el ei senudaus, han pescadurs pigliau ina massa pèschs; leu nua ch’el ha fatg picnic, portan las palmas puspei fretgs, leu nua ch’el ei vegnius en discuors, ein ils carstgauns daventai cuntents. Ed alla fin dil discuors di Diu aunc a Jesus: «Mo sche ti eis cuntents cun tetez, lu sas ti far cuntents ils auters.»
Era sche quei ein ina historia ord in cudisch d’affons, muossa ella sin ina biala moda il senn principal dallas vacanzas: da serevegnir, da far enzatgei bien a sesez e dad esser cuntents. Aschia sperel jeu ch’era Vus hagies giu da quels muments duront las vacanzas e che quella cuntentientscha accumpogni Vus viaden en Vossa lavur ed en Vies mintgadi.