Il süd – üna direcziun chi’d es per blers da nus colliada culla brama da vacanzas, da lös chi cugnuoschan – uschè para almain – be la bella stagiun, savuors e gusts chi’ns sun esters precis illa dretta masüra, e finalmaing: cul mar chi schlargia l’orizont e’ns lascha badair chi’s zoppan amo üna jada oters muonds davo quai chi’s vezza. – Quistas associaziuns sun magara modernas, vacanzas daja nempe be daspö ün pêr generaziuns, plü bod d’eiran viadis plütost stantus; d’inrar as füssa parti sün ün viadi ‚sainza scopo‘, forsa cha la spranza da chattar lavur a l’ester faiva partir a noss antenats, ma sgüra na l’ideja da pudair mangiar ün glatsch a la riva dal mar e nu far oter co far da chastör e contemplar co cha’l sulai va adieu.
Plü bod d’eiran viadis plütost stantus; d’inrar as füssa parti sün ün viadi ‚sainza scopo‘.
E quel va adieu vers vest e na vers süd, il süd quel es la direcziun dal mezdi, cur cha’l sulai sta il plü ot vi dal tschêl. Güst quista colliaziun da direcziuns geograficas e da l’urari dal di es eir per la Bibla centrala. Sainza cumpass e telefonin in man güd’il sulai eir a nus da’ns orientar, quai nun ha müdà il temp chi’ns separa dal vegl oriaint.
L’ost, la daman, quella sta lura per nouvs cumanzamaints, es la direcziun da l’avegnir, dal di amo incuntschaint. Il süd nun ha nöglia da chefar cun vacanzas, ma plütost cullas lavuors cha nus fain al cler dal di. La saira o’l vest ans tegna adimmaint la passagerità da l’ouvra da noss mans sco da nus svess, e’l nord la posa da la not.
Quists impissamaints varan plü probabel eir guidà als da Ramosch cur chi han dal 1926 scrit vers biblics vi da las quatter fatschadas da lur clucher. Vers süd sta scrit ün vers da l’evangeli suainter Joannes. Dieu ais spiert; uschè sto quai esser cha quels chi l’aduran, l’aduran in spiert ed in vardà. (Joan 4,24) – Sülla prada, süls chomps, in büro, in uffizina, a scoula, cul tschütschapuolvra in mans ans vegnan quists pleds affidats. Perche ill’ouvra da minchadi dess nossa cretta far üna differenza, là as bada cun che spiert cha nus eschan vi da noss’ouvra dal di, independent da nossas vocaziuns; là revelescha la glüm dal di, scha nus eschan cristianas e cristians sincers, chi prouvan da viver l’evangeli.
S’insögmiar dal süd, da la bella stagiun, da savuors e gusts esters, da l’orizont schlargià dal mar das-chaina però listess tanteraint, chi saja bunura, mezdi o saira. E las vacanzas ans dessan regalar nouv’energia pel minchadi. Eu giavüsch a tuots üna buna dumengia!