Artar ina biblioteca ei ina caussa delicata. Aschia sun jeu staus loschs, denton era tschaffaus dad in cert respect, cura ch’ins ha fatg mei parsura dalla biblioteca da musica dalla claustra da Mustér.
Il spért da miu antecessur avat Pankraz fladava aunc giud mintga cruna: tgei salvar, tgei midar, tgei trer pli lunsch e co organisar da niev quei scazi musical.
La Nossadunna era ina veritabla butteglia e la cruna blaua igl uvierchel.
Enten zavrar e far uorden hai engartau ina Nossadunna da Lourdes, ina da quellas da plastic miez transparent, empau sblihida e cun ina cruna clar-blaua sin tgau. La Nossadunna era ina veritabla butteglia e la cruna blaua igl uvierchel. En quella transportavan ils pelegrins l’aua da Lourdes si dalla Frontscha dil Sid. Mia tatta Giulia p. ex. duvrava ella per unscher en las combas encunter rematissems, ni ch’ella springeva ella da finiastra ora cura ch’ei tunava e camegiava.
Nunpusseivel da better in tal artefact ellas miardas. Ina Nossadunna, mai e pli mai.
Aschia sun jeu sedecidius da tschentar ella discusamein ella stanza da scolasts sur la maschina da caffè. Sco ina patruna dils beiba-caffè mirava ella giu sin nus; tochen in di ch’ella ei stada svanida. Ed jeu miravel mintga di duront pausa silla cruna sedumandond tgei che seigi capitau culla statuetta. Basta, quei ei stau in misteri per varga miez onn.
In di cura che jeu vegn en biblioteca – ei era gest suenter las vacanzas da stad – cattel jeu la Nossadunna da Lourdes puspei sin miu pult sco sch’ella fuss mai stada svanida. Na gliez, ina miracla? Ni striegn?
Jeu sun sedecidius da dumandar successivamein scolasts e paders sch’enzatgi sappi zatgei dalla Nossadunna da Lourdes. Ed in di, finalmein, di pader Gregor a mi: «Quella hai jeu schau svanir, ell’era macorta e scardalida. Jeu hai mess ella discusamein ella cella da miu confrar pader Gion-Maria duront ch’el era a messa, el ei in grond veneratur da Nossadunna.»
Sc’in miez dedectiv sun jeu ius tier lez per eruir dapli, ed el ha stuiu conceder: «Na gliez, ina biala era ei buc, ed jeu sun sedumandaus danunder che quella derivi. Suenter in temps sun jeu vegnius unfis da mirar sin quei aspect sblihiu. Sils pézs dils calzers sun jeu ius ella cella da frar Stiafen e deponiu ella leu duront ch’el sunava las orglas.»
Quei ha svegliau pér da dretg las marveglias en mei. Dumandond frar Stiafen, sch’el sappi zatgei dad ina Nossadunna da Lourdes ha lez detg: «Stattas Ti davos quei misteri? Jeu sun sedumandaus danunder che quella figura derivi, na gliez, ina tala butteglia en fuorma da Nossadunna. La finala hai jeu tertgau – metta ella en la biblioteca da musica, leu dat ei segir in plaz sin ina cruna denter himnis ed antifonas marianas.
Ed oz paradescha ella aunc adina en biblioteca. In memorial da respect enviers il respect religius dils auters e cunzun enviers l’ierta dad in grond um ed amitg, miu mentur avat Pankraz.