Duront il temps da november, quels dis plein brentina, havein nus magari da sbatter cun schliat’aura, cun ina nebla grischa che zuppenta vi sulegl, cuolms e cuntradas. Las raccoltas ein sut tetg e per il temps dad ir cun ski ei la stagiun aunc buca semtgada. Spassegiadas sin nos imposants e bials cuolms ein buca grad idealas en tals dis. Tgei savessen nus pomai far en nies temps liber?
Gest in tal mument hai jeu per exempel plascher da focussar mess patratgs cun scuvrir caussas novas e buca star en stiva a mischun sin canapé ni forsa guder ina seria da netflix.
Ina pusseivladad fuss visitar ina ni l’autra exposiziun, sco per exempel ina d’art, ina sur d’in tema preferiu e fascinont ni pertgei buca visitar ina exposiziun empau speciala che muossa la situaziun dils cristians persequitai el mund.
Paucs da nus san che mintga tschun minutas piarda in carstgaun zanua en ina part dil mund la veta ord motivs religius. Quei schabegia mintga di, di per di, onn per onn.
La persecuziun e la discriminaziun hodierna ein fetg differentas da quellas dil temps vargau: el temps dad oz schabegia quei pli e pli fetg el zuppau, ellas ein pli subtilas, en entgins cass denton violentas e sanguinusas.
Paucs da nus san che mintga tschun minutas piarda in carstgaun zanua en ina part dil mund la veta ord motivs religius. Quei schabegia mintga di, di per di, onn per onn.
Niessegner ha tarmess ses apostels entochen ils cunfins dil mund per annunziar igl evangeli e segidar cul concarstgaun, cun paupers e basignus, aschia san ins leger egl act dils apostels. El ha buca reteniu a ses giuvnals ch’els vegnan declinai ni anflan resistenza.
Cristians vegnan supprimi e persequitai en ina mesira che nus havein darar viu en la historia dil cristianissem ils davos duamelli onns. Quei ha denton plirs e differents motivs.
Cura che nus tematisein la persecuziun, stuein nus era menziunar che da 196 tiaras sil mund, vegn en biabein 62 tiaras la libertad religiusa violada. En 36 tiaras discurrin nus da persecuziun ed en 26 tiaras da discriminaziun. Quei significa che ina da treis naziuns respecta buca la libertad religiusa.
Ord quals motivs vegn la religiun cristiana refusada tier aschi biaras naziuns? Danuder arriva quella malfidonza encunter cristians che procloman la carezia proximala?
Gest per declarar quei en detagl drova ei biaras e fundadas informaziuns sco per exempel sur da pussonzas statalas, ideologias politicas, stadis naziunalists ni gruppas da stadis cun in islam fundamentalist per stabilisar califats transcontinentals. Talas informaziuns declara l’exposiziun «cristians persequitai el mund» dall’organisaziun «Kirche in Not» sin ina moda fetg emperneivla ed interessanta.