Siglir tar il cuntegn

Header

audio
Pled sin via cun Andrea Cathomas-Friberg
Or da Vita e cretta dals 24.10.2021. Maletg: RTR
laschar ir. Durada: 3 minutas 9 Secundas.
cuntegn

Pled sin via Atun en nies mintgadi

Igl atun ei ella tiara. Dis suleglivs sebrattan cun dis da brentina. Jeu mezza sun in carstgaun dil sulegl. La brentina fa breigias e mi. Quella hai jeu insumma buca bugen. Ella fa tema. Ella lai piarder l’orientaziun e pren beinenqualga ad ins il flad. Ed uss stun jeu cheu, contemplel nies mintgadi e fetg persenn: La situaziun actuala fa propi empau endamen gl’atun cun sia brentina.

Nua ein las valurs e las valetas che valevan inaga? Nua la capientscha e la solidaritad d’avon in onn?
Autur: Andrea Cathomas-Friberg Catecheta

In da quels dis ha ina da mias collegas manegiau: «A mi fa la pandemia negin sterment, sterment fa plitost quei che resta anavos per nies futur!»

Ella ha duvrau gest quels plaids che muentan gia dapi daditg miu far e patertgar. Sco carstgaun dalla cumpignia cun egls ed ureglias aviartas pils auters sedamondel: «Nua meina tut quella situaziun la carstgaunadad?» Ei para savens che mintgin mira mo pli per sesez. Mo igl agen meini vala zatgei. Las valurs sco capientscha, toleranza, acceptar in l’auter, viver e schar viver – nua ein quellas aunc d’anflar?

En Ia lavur cun mes scolarets emprovel da schar far els lur atgnas experienzas. Accumpignar ei mia devisa e quei senza squetsch. Squetsch – quei vai empriu en mia scolaziun – porta resistenza. Resistenza ei savens contraproductiva. Ella meina ad ina stinadadad. E la stinadadad semuossa a mi adina dapli il davos temps – famiglias che san buca discuorer pli ina cun l’autra. Amitgs che han rut giu il contact. Carstgauns violents, agressivs ni adina dapli depressivs. Carstgauns cun tema digl avegnir.

Nua ein las valurs e las valetas che valevan inaga? Nua la capientscha e la solidaritad d’avon in onn?

Toleranza pretenda buca ch’ins parta il meini dils auters. Toleranza dat a mintgin il dretg d’astgar esser d’in auter meini.

Quei citat ha accumpignau nus en nies mintgadi da scola. Per mei eis el denton dapli che mo in citat per in’jamna. Jeu sesprovel d’integrar el en miu mintgadi.

Dar a mintgin il dretg dad haver siu agen meini senza controllar e giudicar. Semplamein aschia sco el ei. Mintgin da nus porta si’atgna responsabladad en nies far e demanar, e quei sedepurtar duei arver portas enstagl da serrar ni sbatter escha. Mintgin da nus vul viver en libertad e quella entscheiva nua che jeu surpassel buc ils cunfins da miu concarstgaun.

Lein pia sestentar per dapli toleranza e capientscha in per l’auter. Gartegia quei a nus – lu sclarescha in radi sulegl atras la brentina e dat nov’orientaziun. E gl’atun semuossa en sias pli bialas colurs.

RTR 08:45 Pled sin via

Artitgels legids il pli savens