Quai che ha cumenzà be per casualitad, cun trenar suletta e cun sajettar sin ina schiba provisorica a l'entrada da la Val Roseg en l’Engiadina, è daventà grond, fitg grond. Al campiunadi svizzer da biatlon l’entschatta d'avrigl a Realp ha Selina Gasparin dentant prendì cumià e terminà la carriera. Quai en «knickerbockers», skis e fists da lain ed ina buis ch’è daditg ord moda.
Igl è bun che la carriera è a fin e ch’i spetga uss in nov chapitel, larmas n’hai betg dà.
Dasper la vita sco biatleta, ch’ha cuzzà bun dus decennis, ha la pioniera da quest sport lavurà en il Grischun sco duaniera, ina lavur ch’ella cuntinuescha en l’avegnir. Er al cunfin porta Gasparin in’arma, gist pliras. Enstagl d’ina buis porta ella al cunfin ina pistola, in vapurisader da paiver, in bastun sco er chanvettas. En l’unifurma cun ina giacca da protecziun e la tschinta d’armas n’è Selina Gasparin betg pli la Selina da sport – mabain ina guardia da cunfin.
La lavur sco guardia da cunfin è speziala e ma plascha bain, ma per fortuna n’hai jau anc mai stuì duvrar in’arma.
Selina Gasparin è maridada cun il Russ Ilja Tschernussow, ch'aveva fatg sco passlunghist bronz als gieus olimpics a Sotschi ils 2014 sur ils 50 kilometers. Ed ella è mamma da dus uffants, Leila e Kiana che han 7 respectiv 3 onns – e viva dapi sis onns a Lantsch, betg lunsch davent da l’arena da biatlon. Ella è ambassadura dal campiunadi mundial da biatlon il 2025 a Lai.
