Siglir tar il cuntegn
cuntegn

Nossa litteratura Theo Candinas

Theo Candinas, naschì ils 19-12-1929 a Surrein.

Purtret da Theo Candinas.
Legenda: Theo Candinas. ANR, Claudia Cadruvi

Theo Candinas ha passentà sia uffanza a Surrein. Suenter il Seminari da scolasts a Cuira ha el studegià a las universitads da Friburg, Paris, Perugia e Neuchâtel. El è stà a partir dal 1956 scolast secundar, scolast a la scola da commerzi da dunnas e scolast da rumantsch al Seminari da mussadras a Cuira.

Sper sia lavur ha Theo Candinas s'engaschà en pliras funcziuns per lingua e cultura rumantscha. El è stà redactur da la Talina (1949-52) e da las Novas litteraras (1960-64). Plinavant è el stà president da l'Uniun da scripturas e scripturs rumantschs (1964-67) e president da l'Uniun svizra da scripturas e scripturs (1977-79). Ultra da quai ha el s'engaschà per la lingua rumantscha tar la Lia Rumantscha. El viva dapi sia pensiun, il 1991, sco scriptur liber a Surrein ed en il Tessin.

Si'ovra voluminusa cumpiglia poesias, dramas, gieus auditivs e texts da prosa. En ils onns 70 han ses texts, surtut las "Historias da Gion Barlac", muventà ils spierts, cun quai che l'autur ha rut en quels texts intgins tabus. Sper scriver sias atgnas ovras, ha Theo Candinas translatà numerusas ovras dad auturs d'autras linguas.

Intginas ovras:

Prosa:

  • Senza Diu, 1952
  • La fuigia dil Stoffel, 1962
  • Entagls, 1974
  • Historias da Gion Barlac, 1975
  • Historias dil Parler Pign, 1986
  • Tè-Tuà, 1993
  • Maria Madleina, 2003
  • Il barun dalla Muota, 2006
  • Sils fastitgs dil Gediu perpeten, 2009

Lirica:

  • Fastitgs e fistatgs, 1959
  • L'orva, 1966
  • Limericks da Gion da Farglix, 1997
  • Raccolta tardiva. Poesias/Spätlese, 2010
  • Rendida dil sulegl - Sonnenuntergang. Poesias veglias e novas, 2016

Dramatica

  • Clau Maissen, 1958
  • La Tuor da Babilonia, 1983
  • In schuldau d'Alsazia en l'Emprema uiara mundiala, 2009

Autobiografia:

  • Reminiscenzas d'in cuort interval terrester, 2012

Premis e distincziuns:

  • Premi da la concurrenza dal servetsch svizzer da feuilleton per istorgias curtas, 1964
  • Premi NSB per istorgias curtas rumantschas, 1966
  • Premi da la concurrenza Fontaniva per istorgias curtas, 1970
  • Premi da renconuschientscha da la Fundaziun Schiller, 1971/1987
  • Premio Cortina di poesia della montagna, 1986
  • Premi cultural da renconuschientscha dal Chantun Grischun, 1990
  • Commember d'onur da la Romania