Siglir tar il cuntegn

Header

cuntegn

Dis da litteratura 2017 A Domat vegn giugà cun la litteratura

Per la 27avla giada han lieu a Domat dals 3-5 da november ils Dis da litteratura. Era quest onn è il program dal happening litterar empermettent - sut il chavazzin "gieus" sa preschentan auturas ed artists sco Manuel Stahlberger, Chatrina Josty, Mario Pacchioli, Dumenic Andry e blers auters.

Sco mintg'onn l'entschatta da november, sa scuntra era quest onn la scena litterara rumantscha a Domat. Ed era quest onn ha il comité d'organisaziun cumpilà in program attractiv tranter ils 3-5 da november 2017, cun nums enconuschents or da la scena litterara rumantscha e svizra: Manuel Stahlberger, Mario Pacchioli, Flurin Jecker, Chatrina Josty, Jürg Gautschi, Dumenic Andry e blers auters.

Da Manuel Stahlberger e Flurin Jecker...

Il fil cotschen che maina tras il program vegn ad esser "gieus" - in tema che sa resplenda surtut en il program da la sonda saira, nua che "vegls" gieus auditivs rumantschs vegnan reanimads, v.d. legids live sin il palc. Ma il program dals Dis da litteratura 2017 cuntegn era anc autras ivettas: Venderdi saira sa preschenta a Domat Manuel Stahlberger, in dals pli enconuschents chantauturs da la Svizra. Sonda damaun prelegia Flurin Jecker en la halla polivalenta Tircal. Jecker, in giuven autur bernais cun ragischs rumantschas, è in dals shootingstars da la scena litterara svizra.

...a Chatrina Josty e Mario Pacchioli

Sonda suentermezdi datti sut il titel "living library" in'occurrenza per sa laschar surprender, nua che persunas raquintan en dialog cun il public or da lur biografia. Sonda vers saira preschenta Mario Pacchioli ses grond project "Remas", in cudesch da poesias per chant ed orchester sinfonic. E dumengia avantmezdi ha alura anc lieu la vernissascha dal nov cudesch "Barba cor / Herzkater" da Chatrina Josty.

Discussiuns e gieus

Radiotelevisiun Svizra Rumantscha vegn a rapportar da maniera largia dals Dis da litteratura. Il Radio Rumantsch dat spazi a discussiuns litteraras, saja en il Magazin da cultura da sonda, ils 4 da november, ubain en il Tavulin litterar da dumengia, ils 5 da november. Il Telesguard purtretescha dus auturs che vegnan a preschentar a Domat lur pli novas publicaziuns: Chatrina Josty (Barba cor / Herzkater) e Mario Pacchioli (Remas). Sco ils davos onns vegn RTR era a rapportar e commentar da Domat en furma dad in "ticker" che cuzza da venderdi saira enfin dumengia.

Artitgels legids il pli savens