Siglir tar il cuntegn

Baratta-Chor BarattaChor: l’emprim barat è gartegià

«BarattaChor» – l'acziun dad RTR – ha cuntanschì ses emprim punct culminant. Flavia Walder ha surdà ses Chor maschadà Sevgein per in’emprova a Remo Weishaupt.

Legende: Video BarattaChor – Co ha funcziunà l'emprim barat da chor? abspielen. Laufzeit 03:36 Minuten.
Or da Telesguard dals 27.11.2017.

Per quels da Sevgein n’è Remo Weishaupt nagin nunenconuschent. Avant 23 onns ha el frequentà ses praticum en la scola a Sevgein. Trais emnas ha el vivì tar la famiglia da Robert e Simonetta Cadalbert a Sevgein. Gugent èn els sa regurdads dals temps passads. E Remo Weishaupt ha concedì ch’el sunava gia lura pli gugent clavazin che preparar las lecziuns da scola.

La sfida per il dirigent da barat: In nov chor ed ina nova chanzun

Flavia Walder ed il dirigent da barat han organisà al telefon l’emprova da chant e tramess las chanzuns per e-mail in a l’auter. Flavia Walder ha dentant era supplitgà Remo Weishaupt d’emprender ina nova chanzun cun il chor. Questa vuless la dirigenta chantar cun il chor da Nadal.

Cunquai ch’i sa tracta d’ina chanzun polacca ha il dirigent laschà davent il text e trenà sulettamain la melodia cun ils divers registers. Remo Weishaupt ed il Chor maschadà Sevgein n'han gnanc duvrà ina mes’ura per emprender la nova chanzun. Il dirigent è stà surstà da la sveltezza dal chor.

Il temp è passà dabot

Al cumenzament hai duvrà in pau temp enfin ch’ils chantadurs e las chantaduras èn sa disads al dirigent ospitant. Dentant èn els stads averts per tut ils exercizis ed èn sa sfadiads da chantar tenor ils exempels da Remo Weishaupt. «Il temp è passà fitg dabot», ha in chantadur dal tenor manegià suenter l’emprova. El ha schizunt fatg la proposta da far dapli da quests barats, lura fissan las emprovas da chant adina uschè variadas. Era per Remo Weishaupt fissi d’avantatg sch’el avess anc in'ulteriura emprova cun il chor da Sevgein. Lura pudess el lavurar anc pli specific vi da tschertas passaschas.

Giavisch da Remo Weishaupt per il proxim barat

Sco proxim surpiglia Flavia Walder per in’emprova la batgetta dal Chor maschadà grischun Turitg. Davart il program da l’emprova ha Weishaupt gia instruì sia collega. Suenter il barat a Sevgein ha il musicist da professiun dentant anc in giavisch a Flavia Walder: El avess gugent ch'ella mussass a ses chor la medema disciplina.

RR actualitad 11:00