Sia musica – schebain en emprima lingia musica da rap – n’è betg uschè simpel da cataloghisar. Ella è inspirada da soul, funk, reagge, rock ed auter pli – simplamain tut quai che plascha gist al musicist. Uschia na correspunda el sez era betg al clisché dal rapper cun las chadainas d’aur ed ils novischems sneakers. Plitost il cuntrari: Cun ses segn da marca, il beret, para el ch’è da professiun educatur plitost sc’in bun camarat, e musicalmain pli fitg sc’in chansonnier.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
Simon Seiler alias «Sim’s» ha vivì diesch onns en Frantscha a Montbéliard, e pli tard a Porrentruy en Svizra. Là ha ses bab ina giada prendì el ad in concert da «Sens Unik» da Losanna. Be paucs onns pli tard ha el lura sez cumenzà a scriver texts da rap. Uss ha el 41 onns, è anc adina in amatur dal hip hop ed è vegnì selecziunà per l’acziun mx3. Durant l’entir mais da matg preschentan uschia ils radios da SRF 3, Couleur 3, Rete Tre ed RTR sia single «Debout» en l’entira Svizra.
