Las redacziuns da musica da RTR, RSI, RTS e SRF promovan communablamain la musica svizra. Cun l’acziun «MX3 – Tuts per 1» vegn preschentada mais per mais ina chanzun, ch'ha attratg l'attenziun. E quai exclusivamain per chanzuns, ch'èn da chattar sin mx3.ch.
Il fanadur 2019 è quai in duo da Turitg:
Niece: «Myself»
Niece è in duo da Turitg che sa cumpona da la chantadura e ghitarrista Anna Luif e dal grischun Beat Cadruvi, ch'è bassist, keyboardist ed autur dals texts. Ina band, che n'è betg fitg enconuschenta, schebain ch'ella exista gia dapi bun 20 onns. Quai schai oravant tut vid quai ch'els na dattan betg concerts. Anna Luif e Beat Cadruvi sa descrivan sco band da la stanza d'emprova. Pia ina gruppa che sa scuntra adina puspè per sunar e che registrescha ina giada mintga decenni in album.
Las ulteriuras chanzuns, mais per mais:
Zercladur 2019
Bumblebees: «Dream Forever»
La gruppa è naschida a Lugano, uss dentant da chasa a Turitg e Losanna. Els fan musica per part electronica en il gener dreampop e neo-psychedelia. Adequatamain ha era lur nova single num «Dream Forever» – «Siemiar per adina». Quella chanzun vegn direct da lur emprim album «Dancing Dots in the Dark» ch'è vegnì publitgà mez matg.
Matg 2019
Chien Bleu: «J'aime le feu»
Chien Bleu – il chaun blau ha cumenzà sia carriera sco chau da la gruppa Sergent Papou che han fatg musica da punk. Ha pli tard dentant scuvert per sasez la musica da rap e trap. Cun dus musicists vul el ussa far part dal moviment dal rap romand. «J'aime le feu» è l'emprima single dal 2019 dal giuven da Genevra.
Avrigl 2019
Naomi Lareine: «Get It»
Ina vusch da Soul e texts plain emoziuns è quai che spetga ins cura ch'ins taidla tiers a la giuvna chantadura Naomi Lareine da Turitg. Ella è fitg ambiziusa e vul cun sia musica da soul e r'n'b cun elements electronics betg be acquistar la parada da hits en Svizra, ella ha era ambiziuns internaziunalas. La single «Get It» è l'emprima sagiada da la EP che Naomi Lareine publitgescha questa primavaira.
Mars 2019
Fiona Cavegn: «Mona Lisa»
L'entschatta da quest onn ha la giuvna chantautura da Breil, Fiona Cavegn, cumenzà in project musical in pau pli spezial. Ella publitgescha numnadamain mintga dus mais ina single. Entras quai duai mintga single avair dapli attenziun e na betg ir a perder en la fulla d'in album. Tuttina èsi in siemi da la giuvna da Breil da publitgar ina giada in disc. Gist l'emprima single ord ses project «Mona Lisa» è daventada la chanzun dal mars da l'acziun MX3 – Tuts per 1. «Mona Lisa» tracta criticamain il tema da la bellezza en la societad d'ozendi.
Favrer 2019
MäLT: «Mon Amour, Mon Amour»
Il duo dal favrer fa musica dal gener electro trip-hop, sa numna MäLT e sa cumpona dals dus musicists Caspar ed FBI. Els dus ch'èn era part da la gruppa the bumblebees èn oriundamain da Lugano èn uss dentant sa chasads a Losanna e Turitg. Ina speziala maschaida da geners musicals e da las linguas. Mumentan lavuran els vid lur emprima EP.
Schaner 2019
Billie Bird: «Les Déferlantes»
Billie Bird u cun ses num civil Elodie Romain è da Losanna e fa musica da folk en in tut agen mantè. La giuvna da 35 onns cun ragischs en Spagna e Frantscha fa musica da pitschen ensi ed ha gia baud cumenzà a scriver agens texts. Il 2018 ha ella publitgà duas novas singles da ses album nov che cumpara quest onn. Ina da quellas singles è «Les Déferlantes».
December 2018
JulDem: «In Another Life»
Nagliur traglischa il sulegl uschè savens sco en il Vallais. Suenter bler sulegl tuna era la musica dal giuven JulDem. Sch'insatge muventa el lura prenda el sia ghitarra e cumenza a cumponer chanzuns. Tar «In Another Life» n'è quai betg stà bler auter. Ina saira ha el vesì ina giuvna ed oravant tut savurà ella. E quai fried è vegnì avant enconuschent ad el, sco sch'el avess gia ina giada savurà il medem. Ditg haja el sa dumandà danunder e lura vegnì tar la conclusiun ch'igl saja forsa stà en in'autra vita, u per englais «In Another Life».
November 2018
Tawara: «Horizon»
Il musicist Florian Trepp alias Tawara da Cuira va gia dapi diesch onns per il mund enturn per far musica. Per quai na dovra el dentant betg bler. Ad el tanscha numnadamain ina tribuna pitschna sin via amez la glieud. Qua sa senta el il meglier e perquai raquinta Tawara en ses nov album «Horizon» istorgias da ses viadis e da sias experientschas. En ses mx3 hit dal november cun il medem titel sco l'album chanta el: «Want to see what's behind it (horizon) / So I move on» e dat cun quai da chapir ch'el n'è anc ditg betg a fin cun ses viadis.
October 2018
Animor: «Somebody Loves You»
Ses idols musicals sajan Marvin Gaye, The Beatles, Tina Turner e Walt Disney di la giuvna Romina Kalsi da Lugano. Quellas influenzas differentas han manà e laschà sa sviluppar si'atgna musica tar ina maschaida da stil da folkpop, musica electronica, soul ed indie. La single «Somebody Loves You» ha ella scrit en sia patria, a la riva dal Lai da Lugano. Là ha ella giudì e nizzegià la bellezza atmosfera ensemen cun ses conmusicists per laschar nascher communablamain quella fina ballada.
Settember 2018
Marquise Fair: «Love Can Be»
Gia sco buob ha Marquise Fair chattà l'amur per la musica. Da gliez temp ha el anc chantà durant servetschs divins. Pli tard sco teenager ha el cumenzà a scriver atgnas chanzuns. Tut quai è dentant stà plitost hobi. Pir dapi paucs onns fa Marquise Fair musica professiunalmain. Mumentan lavura el vid ses emprim album. In insatg sco quai album vegn a tunar ha el gia laschà sentir cun publitgar «Love Can Be», l’emprima single giud l’album da debut. Ina simpla chanzun cun bler schlantsch ed in bun ritmus.
Avust 2018
Marius Bear: «Roots»
Durant il servetsch militar è la vusch marcanta da Marius Bear dada en egl ad in da ses camarats. Cun quella pudess el segir chantar grunge aveva il collega manegià. Grunge n'è betg uschè il favurit da Marius Bear, ma tuttina ha quai motivà el da cumenzar ina giada da far musica sin via. Spert è il giuven da 20 onns vegnì da far vegnir attent sin el ed ha consequentamain survegnì la chaschun da sunar ses emprims concerts. Sin il pli tard suenter la victoria da la concurrenza BandXost è la carriera per Marius Bear lura stada lantschada.
El n'ha dentant betg nizzegià quella buna situaziun da partenza per cumenzar d'ir sin turnea e dar dapli concerts, mabain è sa decis d'anc ir a smatgar in zic il banc da scola. Pachetar ses satgados cun la savida da basa da musica e sa sviluppar vinavant è stà en quai mument pli impurtant. Uschia ha el simplamain fatg in timeout musical per ir a Londra e studegiar musica en la medema scola nua che stars sco Tom Odell, George Ezra u era James Bay han gia fatg lur studis.
In um conscienzius, gnanc tgisà! Bunas premissas pia per che ses comeback suenter il studi pudess gartegiar. Mirveglias tge che vegn a spetgar nus sin il nov album dastgain avair. L'emprima single «Roots» fa speranza che Marius Bear è sin buna via e che quai pudess vegnir bun per el cun ina carriera musicala.
Fanadur 2018
Me & Marie: «Another Place To Go»
Maria de Val e Roland Scandella, quai èn ils nums d'artist da Maria Molling e Roland Vögtli, che furman il duo «Me & Marie». Els èn vairs multi-instrumentalists. Omadus chantan, sunan ghitarra, bass, drums u er orgla electronica, mintgin fa simplamain quai ch'i dovra gist.
Per realisar lur siemi d’avair success cun lur musica e da pudair viver da la passiun èn els emigrads. Els èn ids avant intgins onns en Germania e han declerà Minca sco lur domicil musical. Suenter ina lavur intensiva vi da l’emprim album, suandà d’ina lunga turnea, suonda quest avust il segund album «Double Purpose». L'emprima single ch'els preschentan giu dal nov album è «Another Place To Go». Ina chanzun che maschaida tenor els elements dal Grunge-Pop cun tals da l'Italo-Western.
Zercladur 2018
Tatum Rush: «Gotta Good Chance»
Tatum Rush è naschì a San Diego en California, ha studegià «Performance Art» a Genevra e lavura dapi lura a Losanna, Paris, Berlin e Milaun. Là nizzegia el ses talents multifars sco cumponist, producent, chantautur e sautunz. «Gotta Good Chance» è l'emprima single da ses nov album.
Matg 2018
Le Roi Angus: «Tout ça»
La gruppa Le Roi Angus da Genevra preschenta la chanzun per il matg. Dapi l'onn 2014 fa la gruppa ensemen musica. Lur emprim album han els registrà per part a Friburg e per part a San Francisco. Suenter registrar lur segund album ad Istanbul èn els lura sa preschentads en differents clubs e festivals en l'entira Svizra.
Avrigl 2018
Sam Himself: «Nobody»
En Svizra ha el chattà sia amur per il rock'n'roll, soul ed il blues. Suenter ha il giuven da Basilea bandunà sia patria vers Brooklyn en l'America. Là ha el scuvert novas funtaunas d'inspiraziun sco per exempel la musica da Bruce Springsteen, Tom Petty e la gruppa The Cars. Or da quellas influenzas è sia nova single «Nobody» da ses nov album, che cumpara anc quest onn, naschida.
Mars 2018
Kaufmann: «Lisa»
Per il mars è la seria puspè en mauns grischuns. Reto Kaufmann è la pli giuvna scuverta musicala da Cuira. El fa musica sco «Kaufmann» ed è sin buna via da lantschar ina carriera naziunala. L'atun passà ha el gudagnà la concurrenza BandXost ed ha uschè survegnì la chaschun da pudair producir en in studio professiunal in disc cumpact. Cun «Lisa», l'emprima single giu da l'album «König vu dr Nacht», demussa el ch'el ha nizzegià la schanza unica. Da quest giuven vegn la Svizra anc ad udir dapli.
L'istorgia tar la chanzun
Favrer 2018
Rocky Wood: «Enough»
La band tessinaisa cun commembers ch'èn per l'entir mund enturn – uschia pudessan ins descriver curtamain Rocky Wood. Atgnamain èn els da Lugano, mo ils commembers vivan tranter Berlin, Turitg, Lugano, Bologna e Verona. E co fan ins lura quai cun ils exercizis? Fitg simpel: Ins na s'entaupa betg regularmain mabain be per in per dis, mo lura a moda intensiva. Quels dis vivian lura d'uras nunsfurzadas, plain energia, frestgadad ed improvisaziun. Uschia Fabio Besomi, in dals commembers.
Il 2014 han els preschentà lur DC da debut «Shimmer». Uss suonda in' ulteriur sin il qual la chanzun «Enough» fa furora.
Schaner 2018
Danitsa: «Captain»
La giuvna Genevrina, ch'è naschida a Paris, po esser pli che cuntenta cun il cumenzament dal 2018: selecziunada sco «Mx3 – tuts per 1», nominada per il Swiss Music Award sco «Best Act Romandie» e cun ina gronda accoglientscha tar il public, saja quai al radio u tar ses concerts. Danitsa ha publitgà il november ses album da debut «Ego» e giu da quel era sia emprima single «Captain».
December 2017
Len Sander: «Women On the Run»
Len Sander è ina band turitgaisa che fa gia dapi passa 10 onns ensemen musica. Cumenzà ha tut cun jamsessions casualas en garascha e cun in svilup musical plitost caotic. Quai è lura ì in detg temp uschè vinavant fin ch'ils 5 commembers han badà che quai giess forsa pli tgunsch sch'els faschessan tut quai in zic pli coordinà. Il resultat han els lura preschentà il 2015 sin lur emprim DC «Phantom Garden» – e quel ha bittà grondas undas. Magasins e blogs internaziunals han scuvrì Len Sander cun gronds pleds.
Uss suonda il segund DC e giud quel l'emprima single «Women On the Run». Ina chanzun che transporta a tai la grooviga, funky e forsa magari in zic schrega vart da la vita – tuttina sche ti sesas en il bus, vas cun auto u ès gist vid far il tschitschapulvra.
November 2017
Curdin Nicolay: «Lat da chavra»
L’acziun communabla per la promoziun da musica va en la proxima runda. E quella auda en mauns rumantschs. Il chantautur engiadinais Curdin Nicolay è l’emprim represchentant rumantsch en quella seria che procura per lingias zunt positivas en la scena da musica svizra.
En la Rumantschia auda Curdin Nicolay tar ils musicists bain enconuschents. Schebain ch’el fa gia dapi blers onns musica ed ha adina puspè registrà qua u là ina da sias chanzuns, ha el edì pir questa primavaira ses emprim disc «Silips e furmias». In disc variant ed inspirant cun melodias che van tgunsch e spert en l’ureglia.
Da sia nominaziun sco emprim rumantsch en «Mx3 – Tuts per in» ha Curdin Nicolay gì talmain grond plaschair ch’el ha decidì fitg spontan ed a curta vista da producir in videoclip tar sia chanzun «Lat da chavra».
October 2017
Elias Bertini feat. Camila Koller: «Wonderful»
La segunda chanzun che dastga sa metter en retscha deriva dal Tessin. Elias Bertini e sia chanzun «Wonderful» ch'el chanta ensemen cun Camila Koller.
D’Elias Bertini dastgan ins quasi schon dir ch’el è in chantadur rutinà. El è stà durant 14 onns il chau da la band «Zero in On» da Locarno. Il 2014 ha el prendì enta maun ina carriera solo. Dapi lura ha el gia edì inqual single. Tgi sa sche l’exploit grategia uss cun «Wonderful».
Settember 2017
Cold Bath: «Fire in the Jungle»
L’emprima chanzun da questa acziun è «Fire in the Jungle» da la band Cold Bath da Genevra. Ella vegn preschentada durant il mais settember sin tut ils chanals dals radios cumpigliads.
Promover la musica svizra
Mx3.ch è ina plattafurma per la promoziun da musica da SRF 3, Couleur 3, Rete Tre e Radio Rumantsch. Ella porscha a musicistas e musicists svizzers la pussaivladad da preschentar directamain e senza obstachels lur musica al public. Responsabel è in team interregiunal che lavura en las redacziuns da musica da nossas differentas regiuns linguisticas.
RR actualitad 11:30