La «Festa da la Sontga Crousch» tutga tar las grondas festas da baselgia tradiziunalas a Savognin. Gia la damaun baud a las 06:00 cura ch'ils zenns tutgan il Ave Maria fan 12 (quatter giadas trais) sajets da murters attent la populaziun sin la festa. A las 08:00 uras vegn la «Sontga Crousch» postada sin l'altar principals, accumpagnà danovamain da trais sajets da murters. La messa cumenza a las 10:00 uras cun l'entrada dals celebrants pader Mauro Jöhri e l'administratur Zenon Tomporowski. Ensemen cun ils ministrants vegnan els tras l'entrada principala en la baselgia Nossadonna. L'organist Jürg Wasescha accumpogna musicalmain l'entrada.
Punct culminant da l'onn giubilar
Il Chor viril baselgia Savognin enramescha la messa festiva cun la «Messa da la Bina», la messa che regorda a l'emprima dirigenta dal chor viril, Sabina De Latour. Il chor viril festivescha quest onns ses 175avel anniversari e la «Festa da la Sontga Crousch» è il punct culminant da l'onn da giubileum.
La «messa da la Bina» è atgnamain la «Missa Tertia quatuor vocibus humanis comitante organo» u pli curt la Missa Tertia da Johann Herman Bergerhoff. Igl è ina da las emprimas messas che la dunna oriunda da Breil ha emprendì en cun il chor.