Linard Bardill - Linard Bardill - in bel bardun da chanzuns

Dapi bunamain 20 onns delectescha Linard Bardill uffants e geniturs da la Svizra tudestga cun sias chanzunettas dialectalas, ch’han gì lur entschatta il 1997 cun l’album «Luege, was de Mond so macht» e ch’èn er gia vegnidas translatadas per rumantsch («Mia flotta Lisalotta» 2006). Cumenzà sia carriera ha il chantautur però gia durant ils onns otganta cun in program adressà a creschids, cun chanzuns d’amur e da protest, tegnidas en la tunalitad da maisters sco Men Rauch, Hannes Wader ubain Konstantin Wecker. «I nu passaran» ha el clomà revoluzzamain sin ses emprim disc, purtà da sia vusch sonora, dad ina ghitarra acustica classicala e da modests arranschaments da jazz. Accumpognà da ses ami Pippo Pollina è el ì «Cul asen pel muont aint», colliond la chanzun da strada cun l’art da teateret. Gia baud ha Linard Bardill survegnì divers premis impurtants, per exempel quel da la critica discografica tudestga per ses album «Tanz auf den Feldern» dal 1993. L’artist multifar ha adina puspè surpassà ils limits dal simpel chantauturesser, ristgond experiments cun tuns da tango, cun ambientalissems ed electronica, cun arranschaments sinfonics. U sa laschond provocar da la gruppa da rock, capità sin ses ultim album «Scharans» dal 2014, nua che Linard duettescha cun ses vaschins, ils 77 Bombay Street.