Gion Antoni Derungs è naschì ils 6 da settember 1935 a Vella. Creschì si a Vella en Val Lumnezia ha el chattà sco magister instrumental, organist e dirigent da chors a Cuira sia clamada, il cumponer.
Sia ovra, numnada da Derungs sezza sco «maletg da sia vita», dat perditga da la fantasia artistica e d’ina ferma identitad musicala. En confruntaziun productiva cun las tradiziuns musicalas indigenas gist tuttina sco cun ils sforzs musicals internaziunals dal 20avel e 21avel tschientaner è Derungs arrivà tar ses stil invisibel. Ma er sco intermediatur da cultura engaschà e pedagog da musica ha el fatg in num sur tut ils cunfins or. Betg sco ultim ha sia emprima «opera rumantscha» («Il cerchel magic») mess l’onn 1986 in term impurtant en l’istorgia da musica da la Rumantschia.
Mort è Gion Antoni Derungs ils 4 da settember 2012 a Cuira.
Laura Decurtins ha undrà Gion Antoni Derungs en in cudesch da purtret ch'è vegnì publitgà 10 onns suenter sia mort.
Derungs e la chanzun populara
Sco buob da quatter onns ha Gion Antoni Derungs cumenzà a chantar. La chanzun populara era omnipreschenta a chasa ed en baselgia.
Quai sa mida durant il temp dal gimnasi a Mustér ed il studi da musica. En il mintgadi da lez onns è la chanzun populara absenta. Pli tard, sco cumponist, rescuvra Gion Antoni Derungs puspè ella. La chanzun populara daventa per il cumponist in tschispet fritgaivel.
L’atun 2009 aveva cineast Gieri Venzin registrà in’intervista cun Gion Antoni Derungs. Il resultat è in discurs approfundì davart la chanzun rumantscha, davart l’influenza da quella sin l’ovra dal cumponist e davart l’atgna lavur cumpositorica.
L'opera «Il cerchel magic»
Gion Antoni Derungs ha relaschà in’ovra voluminusa da chanzuns, oratoris, ballets e musica da chombra. Part dal relasch èn però era 10 sinfonias ed anc trais operas en lingua rumantscha. Sia emprima da quellas operas è probablamain la pli enconuschenta: «Il cerchel magic».
Ivettas musicalas da Gion Antoni Derungs:
