Marc Amacher è musicist da blues, oriund da Brienz en il chantun da Berna ed enconuschent tar in public pli grond dapi il 2016, cura ch’el aveva fatg il pass en il final da «The Voice Of Germany». Malgrà dubiusas offertas suenter la show ed il fauss manager, saja quel palc stà ina buna reclama.
La show m'ha gidà dad esser nua che jau sun oz.
Suenter in emprim album «8 Days» cun pauc success ha Marc Amacher decis da registrar da nov intginas chanzuns cun ina nova band. Uschia è il 2019 cumparì «Roadhouse». Il medem onn hai lura puspè dà in punct culminant: Trais concerts en il program preliminar dad Eric Clapton.
Quai e stà ina gronda surpraisa da pudair sunar cun in da mes idols
Durant l’emprim lockdown han Marc Amacher e sia Band registrà in nov album en il Grand Hotel Giessbach, ch'era da quel temp senza giasts. 12 chanzuns han ils musicists registrà durant set dis, ina da quellas la nova single «STFU», ch’è naschida or dal frust da l’emprim lockdown.
STFU duai era esser in messadi per quellas persunas che na taidlan betg pli ina sin l’autra.
L’album «Grand Hotel» cumpara ils 7 da schaner. Enfin lura datti anc intgins concerts acustics da Marc Amacher e ses musicists Norman Süsstrunk (bass) e Dave Flütsch (battaria).