Siglir tar il cuntegn

Header

Navigaziun

Legenda: Guardar il video Nickless. Durada 02:54 minutas.
Or da RTR dals 09.03.2018.
cuntegn

Live tar RTR Nickless – Chapters: Ses segund disc cun bleras perlas da pop

Il musicist da 22 onns preschenta puspè in’ovra da vaglia ed avra il proxim chapitel da sia carriera.

Avant trais onns ha Nicola Kneringer, alias Nickless, procurà per ina partenza fulminanta da sia carriera. Cun l'emprima single «Waiting» è el stà 22 emnas en la parada da hits svizra ed emess gugent tar las staziuns da radio.

La primavaira 2016 è lura cumparì ses disc da debut «Four Years» ch'è rivà sin plazza 4 da la parada (albums). Nickless è lura ì sin turnea ed è stà sin bleras tribunas da festivals per l'entira Svizra enturn. L’onn passà esi stà pli calm, el è sa retratg per cumponer chanzuns novas per ses segund album «Chapters».

Il start è reussì

Quest chapitel nov da sia carriera ha cumenza bain: las chanzuns èn anc adina determinadas da sia vusch e ses sound da ghitarra acustica, però cuntegnan ellas era elements novs tuns da funk sco tar «Groovin‘», da quels da folk tar «Train To Norway» u perfin latins sco tar «Rosemary». E tar ina chanzun dat quai ina bella collavuraziun cun James Gruntz.

Ina part dals tocs ha Nickless registrà tar ses anteriur mentur Thomas Fessler en ils studios 571 a Turitg, auters en chasas prontas per la demoliziun ch’el ha pudì prender a fit. Quel ambient spezial ha procurà che sias chanzuns tunan auter co sin ses emprim disc.

Segir è che Nickless vegn puspè ad avair gronda preschientscha en ils radios sco era sin ils palcs e che sia carriera è per in chapitel pli ritga.