Siglir tar il cuntegn

Header

cuntegn

Live tar RTR Manillio – in vegl enconuschent cun nova musica

Rap poetic, variond cun ina tendenza melancolica – accumpagnà da blers bels detagls musicals – e sco punct sin il «i» cuntegn el era anc in absolut hit da radio: Quai è il terz album da Manillio. E quel taidla sin il num «Kryptonit».

audio
Manillio e ses stil da rap
ord RTR Audio dals 22.04.2016.
laschar ir. Durada: 22 Secundas.

Gea, en la scena enconuschan ins Manuel Liniger, alias Manillio, gia dapi blers onns. Il 2009 ha el dà ils emprims segns da vita cun ses album «Jede Tag Superstar». Ins ha emprendì d’enconuscher el sco rappunz svizzer cun in vast spectrum ch’ins na vegn betg propi d’ordinar e metter en in truchet. Ses repertori è vast e tanscha dal rap pensiv – gea quasi poetic – enfin tar in rap spectacular ritmisond e lung.

Discografia

Avrir la box Serrar la box
  • Jeda Tag Superstar (2009)
  • Irgendwo (2013)
  • Kryptonit (2016)

Il 2013 ha el lura marcà cun ses segund album «Irgendwo» ina clera preschientscha. El ha demussà sias abilitads e laschà sentir ch’el è pront da definir da nov il rap svizzer. Ina conferma per quai è lura stà il success en la parada da hits cun plaz sis dals albums.

«Kryptonit»

Uss, trais onns pli tard, demussa el cun «Kryptonit» ch’ils cunfins èn anc adina stendibels. In pachet cun bass gronds e profunds, fins tuns da ghitarra, shyntie e rap profund. Per il cundiment spezial sa serva el lura anc da levas presas indie-folk enfin tar electropop.

audio
Idea dal nov album Kryptonit
ord RTR Audio dals 22.04.2016.
laschar ir. Durada: 18 Secundas.

Gea, bler dapli na pon ins strusch pli far ... ma bain – i dovra anc in messadi!

Sco tut ils fans da Superman san gia, è il «Kryptonit» il metal ch'engola las forzas da Superman. E tge ha quai uss da far cun Manillio?

El vul mussar cun quai che tut varga e ch’il temp na stat betg airi. Uschia deditgescha el ses nov album a las dumondas fundamentalas ch'era blers auters han gia fatg avant el. Da nua vegn'ins e nua van ins, e co vulan ins passentar il temp tranteren? Manillio s’occupa da temas socials, ecologics e politics, e reflectescha il carstgaun e ses contacts persunals.

Fazit

audio
El stat fidaivel a ses stil
ord RTR Audio dals 22.04.2016.
laschar ir. Durada: 16 Secundas.

L’album sa mussa a moda vasta, fitg multifara e po far ins uschè bain trist sco legraivel. «Kryptonit» è en mintga cas in recumond per tut ils fans dal rap svizzer. Ma cunzunt era per tals ch'han mirveglias e gust da scuvrir nova musica svizra.

Era «Monbijou» vegn adattà per rumantsch

video
«Monbijou» per rumantsch
Or da RTR dals 22.04.2016.
laschar ir. Durada: 1 minuta.

Sco quai che gia Bligg è stà pront d’experimentar cun ina translaziun rumantscha da ses texts è era Manillio stà d’accord da far in curt excurs en il rap rumantsch cun Ivo Orlik.

Artitgels legids il pli savens