Siglir tar il cuntegn

Header

Navigaziun

cuntegn

Live tar RTR Ira May – nagin ESC, nagin burnout persuenter nova musica!

La vusch da Soul svizra, Ira May, ha gì dus onns turbulents. Dapi la publicaziun da ses emprim album «The Spell» dal 2014 è capità bler. Ins pudess dir che tut quai ha forsa stuì capitar, pertge a la musica ha quai fatg bain.

Burnout

La carriera da Ira May, la giuvna chantadura da Sissach BL, è ida liber da 0 sin 100 tut a grad si – n ‘insumma betg tipic svizzer. Sia vusch ha fascinà - nagina dunna ha purtà tant Soul en svizra sco ella. Ils radios, la televisiun, las medias: tuts vulevan Ira May. Tut quai e 50 concerts en in sfratg, quai ha gì ses pretsch: Ira May ha gì da cumbatter cun problems psichics ed è sa tschentada en in burnout.

Ord tut quai ha ella emprendì da dir na, da na betg vulair ademplir tut ils giavischs ed ella chantà be pli sin tribuna u al microfon. Quai è stà per ella sco ina terapia ed ha deliberà ella dal squitsch.

«Eye Of The Beholder»

Che quai ha fatg bain ad ella na schai betg mo en «l’egl dal contemplader», quai audan ins sin il nov album. Ella experimentescha cun differents stils, mussa novas fassettas e sia musica para nunschenada e simplamain lucca. Il fil cotschen tras l’album è sia ferma vusch e la musica enturn ella sa mida adina puspè. Il viadi musical maina tras il mund dal «Motown-Soul» sur il pop enfin tar il reggae.

Ira May n’ha betg mo mess ensemen las chanzuns sin «Eye Of The Beholder» cun bler variaziun e premura. Ella ha era investà blera carezia en la creaziun dal cover ed il cudischet da l’album. Tut è designà d'ina artista ed ils texts da las chanzuns ha ella scrit a maun.

Nagin ESC

Finalmain avess la Svizra ina ferma vusch feminina per trametter al Eurovision Song Contest. Dentant quai giavisch da la naziun ha la mamma da Ira May destruì. Ira May ha stuì empermetter a sia mamma ch’ella na vegnia mai a sa participar per l'ESC – DONN!

Legenda: Guardar il video Ira May sa era in zic rumantsch. Durada 00:06 minutas.
Or da RTR dals 30.09.2016.