Siglir tar il cuntegn

Header

cuntegn

Il segund di a Zuoz Concerts e la notg dals chantauturs

A Zuoz sa rimnan questa fin d’emna chors, musicistas e musicists, amaturs ed amaturas da la chanzun rumantscha per celebrar la lingua e musica materna.

Quai è capità la sonda

Il segund di dal festival da la chanzun rumantscha ha cumenzà cun il chant en famiglia. In lavuratori che duai promover e dar ideas per chantar cun la famiglia. Anc il avantmezdi han sa preschentà l’ensemble vocal Lamaraviglia en baselgia San Luzi cun psalms da J. P. Sweelinck. Suenter gentar e chaschun da chantar sin via han demussà differents cumponists e cumponistas sch’els vegnan da cumponer entaifer in’ura ina chanzun. La saira eran lura puspè plirs concerts en baselgia. Questa giada cun il «Cor masdà Valsot», «Cor da seniorAs d’Engiadina», «Cor masdo da Puntraschigna» ed il «Cantus Firmus Surselva». Il di vegniva cumplettà cun la notg dals chantauturs e las chantauturas. Gianni Tschenett, Chiara Jacomet & Pascal Dittli, Prefix e Ganes s’inscuntran per concerts intims.

Nov cudeschet da chant – «Rebombs muntagnards»

Aposta per il segund festival da la chanzun rumantscha ha l'Uniun dals Grischs edì in cudeschet da chant. Quai sin dumonda dal comité d'organisaziun. La gruppa da lavur enturn Hermann Thom, ch'era president fin la fin da zercladur, ha contactà divers chantaduras e chantadurs, chantauturas e chantauturs ladins ma era autras valladas rumantschas. Il resultat è in cudeschin cun 34 chanzuns. Chanzuns novas, chanzuns pli u main enconuschentas, balladas ed er in rap. La speranza è, ch'il cudeschin vegn duvrà a partir da questa fin d'emna per chantar da cumpagnia, en classas da scola ed era en chors. Da cumprar datti il cudesch durant il festival a Zuoz e suenter tar l'Uniun dals Grischs online ed en il Chesin Manella.

audio
Nov cudeschin da chant da l'UdG
ord Actualitad dals 02.07.2022.
laschar ir. Durada: 1 minuta 53 Secundas.

Famiglias èn arrivadas per il chant en famiglia

Var 50 uffants e geniturs s’han radunads per il chant en famiglia. Sut la batgetta da las famiglias Würms e Janett han tuts ensemen chantà e sunà. Entant ch’igl è stà in success al festival da la chanzun rumantscha, para il chant en las famiglias rumantschas betg plì d’esser omnipreschent. La speranza da Ladina Würms è però – che quest chant da cumpagnia ha motivà ad in ni l’auter da prender cun sai las impressiuns e da chantar puspè dapli er privat.

audio
Chantar en famiglia
ord Actualitad dals 02.07.2022.
laschar ir. Durada: 2 minutas 43 Secundas.

Nossa chanzun: I vul anc in pau exercizi

L’emprima emprova per chantar cuminaivel «Nossa Chanzun» è gia gartegiada il venderdi saira sin plazza da scola a Zuoz. Passa 100 persunas han chantà sut la batgetta dal president dal comitè dal Festival da la chanzun rumantscha per l’emprima giada «Nossa chanzun», cumponì da Curdin Lansel ed il text è dad Alfons Clalüna.

audio
Emprim'emprova da «Nossa chanzun»
ord Actualitad dals 02.07.2022.
laschar ir. Durada: 3 minutas.
video
«Nossa chanzun»
Or da Musica dals 02.07.2022.
laschar ir. Durada: 2 minutas 13 Secundas.

Intervistas spontanas al festival

Cun enscuntrar adina puspè glieud che visitescha il festival, datti muments fitg prezius, nua ch’ina intervista finescha tut tenor cun chant spontan.

audio
Chant spontan durant las intervistas
ord Actualitad dals 02.07.2022.
laschar ir. Durada: 2 minutas 46 Secundas.
video
Chant spontan – sche jau fiss randulina
Or da Musica dals 02.07.2022.
laschar ir. Durada: 14 Secundas.

Il star da cumpagnia suenter ils concerts

Venderdi saira ha gì lieu il chant avert en in hotel a Zuoz. Surtut chors èn sa radunads a las 22:00 per chantar chanzuns rumantschas. Fin suenter mesanotg è vegnì chantà a tut pudair.

video
Chant cuminaivel
Or da Musica dals 02.07.2022.
laschar ir. Durada: 2 minutas 15 Secundas.

Ina differenza da vegliadetga da 60 onns

Marco Frigg da Zuoz, il giarsun da batger, è dapi passa in onn commember dal Cor Viril Guardaval. Cun ses 20 onns è el il pli giuven dal chor. Il pli vegl ha passà ils 80. Tuttina na gioga quai nagina rolla. L’impurtant saja per el da pudair chantar

audio
Ina differenza da vegliadetga da 60 onns
ord Actualitad dals 02.07.2022.
laschar ir. Durada: 2 minutas 22 Secundas.

Chant spontan dal Chor Patschifig

En pli u main mintga chantun è vegnì chantà al segund di dal festival. Tranter auter ha embellì il Chor Patschific da Cuira il suentermezdi cun sias chanzuns.

audio
Chant spontan dal Chor Patschifig
ord Actualitad dals 02.07.2022.
laschar ir. Durada: 4 minutas 14 Secundas.
video
Chor Patschifig da Cuira
Or da Musica dals 02.07.2022.
laschar ir. Durada: 43 Secundas.

Cumponer a prima vista

En la sala da teater dal Lyceum Alpinum, il Zuoz Globe, ha il cumponist renumà Ruedi Lutz cumponì ina chanzun a prima vista. El ha survegnì ina poesia da la scriptura Engiadinaisa Gianna Olinda Cadonau, ed ha transfurmà quella en ina melodia, ina chanzun. Quai entaifer be in’ura. Cun ses clavazin e Gianna Olinda Cadonau, ch'ha prelegì toc per toc da la poesia, s'ha il cumponist laschà inspirar dals pleds, scrit si las notas e cumponì ina nova chanzun.

Ruedi Lutz ha cumponì ina chanzun ord ina poesia da Gianna Olinda Cadonau.
Legenda: Ruedi Lutz ha cumponì ina chanzun ord ina poesia da Gianna Olinda Cadonau. RTR, Selina Planta

Voluntaris giuvens mancan

Per organisar il Festival da la chanzun rumantscha vuli er ina pluna gidantras e gidanters. Erna Romeril-Klarer è la scheffa dals voluntaris. Da chattar glieud giuvna che vegn a gidar saja stà ina rauba da l’impussibel. Dentant sajan ils commembers pli vegls da las societads immediat stads pronts.

audio
Voluntaris giuvens mancan
ord Actualitad dals 02.07.2022.
laschar ir. Durada: 4 minutas 38 Secundas.

Chanzuns preferidas

Suenter avair passentà in di entir cun chant e musica al segund di dal Festival da la chanzun rumantscha a Zuoz han ils visitaders rimnà ina pluna impressiuns. Uschia Milena Brasi dad Opfikon, ch'è vegnida express per il festival en Engiadina. Er la Zuozingra Nina Magni ha giudì l’atmosfera cun adina puspè chant e musica en differents lieus.

audio
Chanzuns preferidas
ord Actualitad dals 02.07.2022.
laschar ir. Durada: 2 minutas 21 Secundas.

RTR actualitad

Artitgels legids il pli savens