Siglir tar il cuntegn

Turnea da festivals 2018 Quai èn las bands a Monte Carasso TI

8 Bands. Mintgamai 15 minutas. In public. Per l'emprima giada en Svizra taliana. Gievgia ils 14 da zercladur 2018.

Questa giada live da Monte Carasso tar Bellinzona.
Legenda: Questa giada live da Monte Carasso tar Bellinzona. RTR

8x15 – hä?

Il princip è simpel. 8 bands sunan la medema saira al medem lieu. Questa giada per exempel a l'Open Air Monte Carasso sur Bellinzona. Dentant auter sco uschiglio na suna betg mintga band in'ura, mabain be precis 15 minutas. L'idea: Musicists da differents stils e da tut las regiuns svizras stattan sin il palc ed han da persvader ad in public che na correspunda forsa betg dal tut al public da scena usità. La schanza: Pudair far in pass sur ils cunfins da la scena ed uschia gudagnar in u l'auter fan nov.

All XS
Legenda: All XS MAD

20:00 All XS - sur tut ils cunfins cun stupent indie

All XS na cunuscha ni temp ni stil. Els cumbineschan tut il pussibel ed impussibel. Il resultat: musica unica cun stupent indie sin il tablet d'argient. Ils quatter musicists da Berna èn adina buns per surpraisas musicalas.

Kaufmann
Legenda: Kaufmann MAD

20:25 Kaufmann - musica per il barbagiat u per il mal d'amur

Sia musica? Il meglier soundtrack per dumengias, nua che la sonda ha puspè ina giada cuzzà bler memia lung. La musica da Kaufmann dumogna il quasi impussibel: Purtar glisch en il stgir. Reto Kaufmann, dal rest da Cuira, è uschia ditg la pirla per il di suenter. Per savair tadlar Kaufmann na ston ins betg far baracca. Sia musica da folk cun melanconia pon ins adina tadlar e siemiar u studegiar.

F. Way
Legenda: F. Way MAD

20:50 F.Way - Rock Made in Ticino

Rock cun energia e melodia. Quai è F. Way dal Tessin. Cun rock classic, da headbangers fin tar chanzuns per star bratsch en bratsch datti tut tar els. Il quartet dal Sopraceneri ha gia concertà en Ucraina e Russia. Il 8x15 è per els ussa dentant ina giada in concert da chasa.

Mark Kelly
Legenda: Mark Kelly MAD

21:15 Mark Kelly - striuna in rir cuntent en fatscha

In rir fin si sut las ureglias. Quai è Mark Kelly. Sia musia procura per ina buna atmosfera. Cun tadlar èn ins insanua tranter vatta da zutger, artg son Martin ed unicorns. Oriund da Manchester stat el ussa a Losanna.

Jack Slammer
Legenda: Jack Slammer MAD

21:40 Jack Slamer - Rock sincer, live e plain energia

Jack Slammer s'enconuschan gia ina mezza vita. E tuts han pers lur cor al Rock'n'Roll. Musica che ha gia ses grond temp, ditg avant ch'ils musicists da Jack Slamer eran insumma sin quest mund. Ils musicists da Winterthur numnan sco idols Rival Sons e Wolfmother.

Ursina
Legenda: Ursina MAD

22:05 Ursina - musica rumantscha cun influenza scandinava

Ursina è creschida si en Surselva circumdada da musica classica e chanzuns rumantschas. En la giuventetgna tadlava ella Tom Wais, Jeff Buckley, Feist e Billi Holyday. Attratga dal folk scandinav ès ella ida cun 25 a star a Copenhagen. L'influenza da l'atmosfera nordica e la distanza tar la patria ha motivà ad Ursina Giger da scriver las emprimas chanzuns. Oz tutga Ursina tar las fatschas da la musica rumantscha.

Poche Spanne
Legenda: Poche Spanne MAD

22:30 Poche Spanne - Rap tessinais

Uras, ch'ins auda era puspè ina giada da l'autra vart dal Gotthard musica da Rap. Pocha Spanne hani num ed èn dal Tessin. Mattak e Funky Nano han gia fatg in num en il Tessin. Ussa duai lur musica ir sur ils cunfins dal chantun ora. Il video da musica «Knowledge», ch'els han publitgà l'entschatta da l'onn, quinta sin youtube gia in quart milliun views.

Suma Covjek
Legenda: Suma Covjek MAD

22:55 Šuma Čovjek - musica per rir, cridar e saltar

Ils diesch musicists cun ragischs svizras-bosniacas-algeras han preschentà quest favrer lur platta «No Man's Land». Da balkan-sound, polka sur brass, world-music e Jazz suna Suma Covjek tras la Svizra. Sche els sunan, lu pon ins saltar, cridar, tadlar e studegiar il medem mument.

RR actualitad 11:00