Siglir tar il cuntegn

Header

cuntegn

Festivals Trais vuschs novas en l'Europa

Era tar la 33avla ediziun da l'Eurosonic Festival a Groningen han ins pudì scuvrir nova musica da tut l'Europa.

Durant noss trais dis a Groningen avain nus visità radund 30 concerts. Avain tadlà chantauturas, DJs, rockers, e musicists electronics. Per part tuns fins che han derasà ina bellezza atmosfera, per part tuns pli dirs ch'han fatg buglir il sang e per part era tuns scurils, ch'ins n'è betg segirs sche quels plaschan u betg. Tranter tut quels artists èn trais dads en egl spezialmain a nus.

Avec

La giuvna chantautura austriaca ha per propi num Miriam Hufnagl ed ha 23 onns. Sia cumparsa sin tribuna è sin l'emprima egliada in pau modesta e simpla. Quai sa mida dentant, uschè spert ch'ella cumenza a chantar. Cun sia vusch extraordinaria chanta ella chanzuns da pop tschiffantas che persvadan cun bels details sco per exempel ils instruments da flad che accumpognan. Finalmain puspè ina giada musica da pop fatga acustica senza firlefanzas electronicas.

audio
AVEC ina da las scuvertas a l'Eurosonic Festival a Groningen
ord Actualitad dals 21.01.2019.
laschar ir. Durada: 7 minutas.

Kawala

Gia suenter ils emprims per pleds han ins stuì avair gugent ils giuvens da la gruppa Kawala. Jim Higson e Daniel McCarthy da Londra interageschan fitg simpatic cun il public, fan sgnoccas e na sa prendan sasez betg memia serius. Quai è l'emprim che croda si tar els. Lu persvadan els dentant cun l'energia ch'els mettan en lur musica. Senza retegnientschas saglian e sautan els per la tribuna enturn durant sunar e chantar lur tipic indie-pop englais.

audio
POHLE DOMINIC, KAWALA AL FESTIVAL EUROSONIC A GRONINGEN
ord Actualitad dals 22.01.2019.
laschar ir. Durada: 6 minutas 35 Secundas.

Elderbrook

Elderbrook fa musica electronica ed è sez l'ovra electrica che dat l'energia. Sin tribuna mida il giuven englais Alexander Kotz tranter plirs synthesizers, keyboards ed in drum pad. Quai cumplettescha el cun sia vusch varianta. Musica che fiss perfetg per in club che n'ha dentant er betg da sa zuppar dals radios gronds.

audio
Elderbrook
ord Actualitad dals 23.01.2019.
laschar ir. Durada: 7 minutas 13 Secundas.

Ulteriuras scuvridas

Quels artists n'han betg dumagnà il segl en nossa top 3 valan dentant era la paina da tadlar:

  • Bishop Briggs: Gronda vusch cumbinà cun gospel ed elements moderns.
  • Lenny: Vusch da fim s'inscuntra cun instruments da flad e power-pop.
  • The Holy: Rock extatic finlandais uschè dirs sco l'enviern en lur patria.
  • Slow Readers Club: L'essenza da las meglras indie-bands englaisas dals onns 2000.
  • Blackwave: Oldschool hip hop cun Sektion Kuchikästli samples.
  • Rimon: R'n'B, rap e jazz per corp ed olma.

RR actualitad 09:30

Artitgels legids il pli savens