Siglir tar il cuntegn

Header

Navigaziun

Legenda: Guardar il video 10 onns Festival da Jazz. Durada 02:40 minutas.
Or da Actualitad video dals 29.03.2017.
cuntegn

2017 - Festival da jazz In clown sin natalizi

Questa stad po il festival da jazz San Murezzan festivar ses anniversari da diesch onns. Per l’ediziun da giubileum spetga puspè ina lunga e vasta glista d’artists ord il mund dal jazz sin la visita en il famus «Dracula Club».

Dapi il 2007 datti per l’emprima giada in pitschen festival cun in per concerts en il Dracula Club a San Murezzan. L’iniziativa è vegnida da Christian Jott Jenny e ses «Amt für Ideen» da Turitg, mussond che visiuns e siemis pon daventar realitad. Cun gronda perseveranza, engaschament ed idealissem ha Jenny persequità sia idea ed il festival cun il num rumantsch «Festival da jazz» è creschì ad in crescher ed è daventà in eveniment da num e da pum cun gronda reputaziun.

In pitschen festival daventa in eveniment da renum ed ils stars dal jazz mundial vegnan en il Dracula Club

L’emprim eran surtut artists svizzers sin il palc: Franco Ambrosetti, George Gruntz, Eliana Burki u Dani Felber e ses quartet.

Mintg’onn è il program vegnì pli internaziunal, pli pretensius ed ils nums pli prominents. Suenter mintg’ediziun vegneva la dumanda: è quai pussaivel da preschentar anc pli grondas corifeas?

Purtret da Paolo Conte.
Legenda: Paolo Conte, chantautur e jazzist talian. C. Cicardini.

Igl è stà pussaivel: Paolo Conte, Stanley Clarke, Al di Meola, Dieter Meier, Al Jarreu, Bobby McFerrin e blers auters han visità San Murezzan per sa preschentar sin il palc dal Dracula Club. Procurond per sairadas nunemblidaivlas en in’atmosfera unica. Gist pervi da l’atmosfera quasi intima en quest local cun in pitschen auditori èn ils concerts daventads enconuschents. Quai ha fascinà blers dals protagonists, perquai restan els fidaivels al festival e turnan adina puspè gugent ils onns sequents.

10 onns festival da jazz cun in program excepziunal

Per l’ediziun d’anniversari datti divers revairs cun stars dal jazz. E quai tras tut ils sut-geners dal Be Bop fin tar il jazz da fusiun.

Purtret da Herbie Hancock.
Legenda: Herbie Hancock, pianist da jazz american. Festival da jazz.

Da la partida vegnan ad esser interprets da renum sco Paolo Conte u ils americans Lee Ritenour e Chick Corea. Ils pianists èn represchentads fitg bain e vast, per exempel cun Herbie Hancock, Michel Legrand ubain Fazil Say – in pianist tirc che deriva da la musica classica.

Il program dal festival da jazz da giubileum na fiss però betg cumplet senza in per surpraisas che porschan tuns nunusitads. Uschia sa preschentan il Dj austriac Richard Dorfmeister, il violinist brittanic Nigel Kennedy, la bassista polaca Kinga Gyk, la virtuosa pianista giapunaisa Hiromi e l’accordeonist franzos virtuos Richard Galliano.

Sco ivetta tut atgna e speziala astga il festival beneventar l’entertainer e musicist Helge Schneider – enconuschent per ses concerts selvadis, sturns e zunt divertents.

Il program dal festival da jazz 2017

05.07.2017Othella Dallas
05.07.2017Timo Lassy Band
05.07.2017Jazzrausch
06.07.2017Cory Henry & The Funk Apostles
07.07.2017Madeleine Peyroux
08.07.2017Michel Legrand
09.07.2017John Pizzarelli
10.07.2017Monty Alexander
11.07.2017Lee Ritenour
12.07.2017Don & Dave Grusin
12.07.2017Fazil Say
13.07.2017Jazz the Story
13.07.2017TOSCA Richard Dorfmeister & Rupert Huber
14.07.2017James Gruntz
15.07.2017Fourplay
16.07.2017Hiromi Duet: feat. Edmar Castañeda
18.07.2017The Manhattan Transfer
19.07.2017TBA
20.07.2017Jacob Collier
21.07.2017Chick Corea & Bela Fleck
22.07.2017Michel Camilo
22.07.2017Joey Alexander
23.07.2017Sarah McKenzie Quartet
23.07.2017Kinga Glyk
24.07.2017Nigel Kennedy
25.07.2017The Earth Wind & Fire Experience feat. The Al McKay all Stars
26.07.2017Herbie Hancock
27.07.2017Franco Ambrosetti
28.07.2017Paolo Conte
29.07.2017Mare Nostrum 
30.07.2017Helge Schneider

RR actualitad 08:00