Siglir tar il cuntegn

2017 - Festival da jazz RTR al 10avel Festival da jazz

RTR registrescha al Festival da jazz a San Murezzan ils concerts da James Gruntz, Herbie Hancock, Franco Ambrosetti, Mare Nostrum – Fresu, Galliano & Lundgren, Helge Schneider e porscha ensemen cun RSI in livestream dal concert Earth, Wind & Fire Experience feat. Al Mckay All Stars.

Dals 29 da fanadur enfin ils 19 d'avust preschenta il Magazin da cultura mintgamai la sonda a las 11:00 concerts registrads dal Festival da jazz a San Murezzan:

  • 14 da fanadur: James Gruntz, il musicist e chantautur da 29 onns da Basilea è in nev da George Gruntz ed in dals gronds jazzists svizzers. James ha realisà enfin uss 5 discs e hits che van savens er al radio, sco per exempel: «Heart keeps dancing» ubain «Everything is gone». Actualmain sa prepara el per registrar ses proxim disc che cumpara l’atun.
  • 25 da fanadur: Earth, Wind & Fire Experience feat. Al Mckay All Stars, la band legendara Earth Wnd & Fire, fundada il 1970 da Maurice White, è ina da las bands cun il pli grond success. Ella ha fusiunà differents stils da musica sco R&B, soul, funk, jazz, disco, pop, rock e latin ed han realisà gronds hits e semperverds sco: «Getaway», «September, «Boogie Wonderland» ubain «Let's Groove». Er suenter la mort da ses fundatur è la band anc activa, però i dat er projects laterals. In è quel da ses anteriur ghittarist Al Mckay che lascha surtut reviver quels gronds hits cun ina show impressiunanta en il stil dals onns 70 ed 80.
Legende: Video Livestream da la piazza di Poschiavo abspielen. Laufzeit 00:29 Minuten.
Or da RTR dals 11.07.2017.
  • 26 da fanandur: Herbie Hancock è naschì il 1940 a Chicago e vala sco in dals gronds innovaturs da la musica dals ultims 50 onns. Hancock fa jazz, fusion, funk ed electro. El ha cumponì tschients da tocs e cun «Cantaloupe Island» e «Watermelon man» ha el realisà gronds classichers. Hancock ha sunà cun Miles Davis, Dexter Gordon e Chick Corea.
  • 27 da fanadur: Franco Ambrosetti, il trubettist tessinais è in dals pli impurtants jazzists svizzers. Er sch’el è sta schef e patrun d’ina atgna interpresa ha el er fatg carriera musicala – e quai ina zunt remartgabla. El è segiramain in dals musicists svizzers ils pli enconuschents e renconuschids. Er el ha pudì sunar cun grondezzas sco Kenny Barron, Steve Coleman, Tommy Flanagan e John Scofield.
  • 29 da fanadur: Mare Nostrum – Fresu, Galliano & Lundgren: Richard Galliano è in cumponist frances ed in dals gronds virtuos dal orgel da man – Paolo Fresù, il trumbettist vegn da la Sardegna – e Jan Lundgren è in pianist da la Svezia. Mintgin dad els è in musicist excepziunal ed enconuschent tar ils amaturs dal jazz. Mintgin ha sia atgna band e ses agens discs e per «Mare Nostrum» èn els sa mess ensembel ed han furmà ina briglianta gruppa da jazz che fascinescha cun ses ambient da tuns.
  • 30 da fanadur: Helge Schneider è in um cun blers talents. El è entertainer, cabarettist e comicher, autur, reschissur ed actur, e surtut er musicist da jazz. Quai è forsa sia vart main enconuschenta. Però Helge Schneider è propi in musicist talentà ed in che sa sunar blers instruments, dal piano fin la trumbetta ed il saxofon. Da rir èsi en mintga cass cur ch’el è sin il palc e divertescha ses public cun sias chanzuns e sias parodias.

Ultra da quai preschenta il Magazin da cultura dal 1. fin ils 22 da fanadur mintgamai la sonda a las 11:00 quatter previstas dal Festival da jazz.

WHAT THE JAZZ...?

Grafica cun ina battaria, ina trumbetta e duas gitarras
Legenda: RTR

Anc noviz dal jazz? Quai na fa insumma nagut! Nus dain la pussaivladad da far ils emprims pass en quest mund.

  • En ina seria da videos pudais emprender d’enconuscher il quartet tradiziunal da jazz sin basa d’in simpel e melodius standard.
  • Ils 25 da fanadur pudais lura entrar en il mund dal jazz cun il bassist Lucas Schwarz. Ensemen cun el pudais s’avischinar al jazz en in’ura speziala che cumenza las 11:00 al Radio Rumantsch.