Siglir tar il cuntegn
Inhalt

2017 - Festival da jazz Cun Helge Schneider serra il festival da jazz las portas

Cun ina saira umoristica ensemen cun Helge Schneider è il festival da jazz ì a fin. In festival che ha purtà blers gronds nums dal jazz a San Murezzan, ma era in che ha visità cun la Tour de charme ulteriurs lieus da noss chantun.

Helge Schneider sin il palc al festival da jazz.
Legenda: Helge Schneider ha serrà il 10avel festival da Jazz a San Murezzan. Fotoswiss.com / Giancarlo Cattaneo

Cuntents e satisfatgs po il directur dal festival da jazz, Christian Jott Jenny, guardar enavos sin ina ediziun da giubileum grategiada. Cun gronds nums, gie cun legendas, dal jazz mo era cun novs e giuvens nums èn ins vegnì da carmalar millis da visitaders a l’ediziun da giubileum.

Tour de charme

Ina ediziun che n’ha betg mo preschentà acts en il Dracula Club, il quartier principal dal festival. Cun il titel «Tour de charme» han ils organisaturs pruvà da purtar il fieu ch’è s’envidà en il Dracula Club viadora en auters lieus. Uschia ha Jamie Cullum carmalà e divertì in vast public a Muottas Muragl. Earth, Wind & Fire Experience da Al McKay han visità Poschiavo e Fazil Say ha sunà cun ses piano entamez il guaud da tais.

I vegn ad ir vinavant

Las emprimas ideas per il proxim festival, la 11avla ediziun, sgolan gia per il chau dal directur Christian Jott Jenny. Mo uss ha quai sco emprim ina giada num da far in zic pausa, laschar tschentar il giubileum, trair flad e lura cumenza tut puspè da l’entschatta.

RR actualitad 11:00