Siglir tar il cuntegn
Inhalt

EBU folk festival Festival da folk da l'EBU a Krakau: 08 fin 11-07-2015

Il festival da folk da l’Uniun da radio e televisiun da l’Europa è in eveniment da tradiziun ch'è vegnì organisà gia per la 36avla giada.

Gruppa da musica Robin Mark suna avant public.
Legenda: Robin Mark (orgelin), Florian Mächler (ghitarra), Pirmin Huber (contrabass), Lukas von Flüe (batteria, percussiun). Piotr Krochmal

Musica grischuna al festival da folk da la EBU a Krakau

Robin Mark e ses quartet han partecipà al festival

Il festival da folk da la l’Uniun da radio e televisiun da l’Europa è in eveniment da tradiziun ch'è vegnì organisà gia per la 36avla giada. Regularmain è RTR preschent cun furmaziuns da musica dal Grischun, per exempel il 2007 a Cork cun ils Fränzlis da Tschlin, e l’onn passà a Rättvik en Svezia cun Corin Curschellas. La finamira è da preschentar la varietad da la musica populara e da folk en l’Europa e da far il pussaivel per preservar e sviluppar quellas tradiziuns. Il festival da quest onn è stà a Krakau en Pologna.

Vista sin la citad veglia da Krakau.
Legenda: Krakau ha ina bella citad veglia cun in quartier giudaic ch'exista dapi il 1300. EBU

Krakau : 250 km al sid da Warschau, 760‘000 abitants, ha ina bella citad veglia. Ozendi è Krakau in center da scienzia e biotecnologia, i dat 11 scolas autas ed universitads cun sur 200'000 students. L’onn 2000 è Krakau stà chapitala culturala da l’Europa, e quai ha dà numerus impuls per renovar e modernisar la citad. E dapi quella giada èn era sa stabilidas bleras activitads culturalas: festivals da teater, da musica d’orgel, in festival da la cultura dals gidieus e blers festivals da musica.

La furmaziun svizra: Robin Mark e ses quartet

Gruppa da musica Robin Mark suna avant public.
Legenda: Robin Mark (orgelin), Florian Mächler (ghitarra), Pirmin Huber (contrabass), Lukas von Flüe (batteria, percussiun). Piotr Krochmal

Robin Mark (naschì il 1989 a Cuira) da Razén, in musicist zunt engaschà, ha diversas furmaziuns. Las chapellas Bodaguat e Purzelbaum fan musica populara. Cun ses quartet surpassa el ils cunfins ed integrescha er tuns da folk e jazz.

Lur concert en il museum da tecnic da Krakau, in concert cun blera tensiun e dinamica ha procurà per bler applaus e bunas reacziuns, er dals schurnalists da musica da tut l’Europa che han persequità il festival.

In festival cun musica da tut il gener e da tut l’Europa

Il festival da folk da la EBU cun 23 gruppas ed interprets/as è stà integrà en ils festivals da musica Crossroads ed EthnoKrakow cun passa 200 furmaziuns da tut il mund. Partecipà han per exempel l’Austria cun la furmaziun Madame Baheux, in quartet da dunnas da Vienna, che fa jazz ed ina maschaida da rock e musica da tut il mund, la Bulgaria cun Belonoga, il project da Gergana Dimitrova, chantadura da la furmaziun renumada «Le Mystere des Voix Bulgares» e Maria Kalaniemi è ina accordeonista da renum da la Finlanda che interpretescha musica tradiziunala da ses pajais ed er tocs innovativs ch’ella ha cumponì sez. Ulteriuras furmaziuns zunt interessantas èn stà: Sher on Sher da la Germania (Klezmer, musica gidieua), la Góbé Band (musica tradiziunala da l‘ungaria), Gro Marie Svidal (violinista, musica tradiziunala da la norvegia), Ahlberg, Ek & Roswall da la Svezia, (in trio chi fa musica tradiziunala, cun violina, gittara e nickelharpa (arpet). Quellas èn sa preschentadas sin 4 palcs en in museum, en il center da congress resch nov, en la baselgia da Sta. Catharina e sin in palc sin la plazza Wolnica, ina gronda plazza amez il quartier giudaic da Krakau.