Siglir tar il cuntegn

Header

cuntegn

EBU Folk Music Festival Dus «Tschiainders» sin la Plazza cotschna

Curdin e Domenic Janett vivan per la musica. Gia da giuvens han els fatg musica da bal a Tschlin, han sunà cun ils «Frars Janett e Caviezel», cun ils «Fränzlis da Tschlin» e sco duo van els anc in pass enavant cun interpretaziuns tut atgnas da tocs tradiziunals e da lur cumposiziuns.

Curdin e Domenic Janett han passentà bler temp cun far musica. Emprovas e concerts cun la musica da Tschlin e sunar notgs a la lunga, cura ch'i deva in bal. Cun ils «Fränzlis da Tschlin» èn els lura daventads enconuschents. Curdin e Domenic han però era blers auters engaschaments, e dapi in pèr onns sunan els era sco duo. Cun l'orgel da maun e clarinetta preschentan els l’essenzial da lur percurs musical cun elements da l’Engiadina ed in pau exotica da sur cunfin.

Far viadi en Russia n'è betg simpel

Da la dumonda, sch'els avessan gust da preschentar lur musica a Moscau al festival da folk da l’Uniun dals radios e da las televisiuns publicas da l’Europa (EBU/UER), èn els immediat stads intgantads. Uschia avain nus planisà noss viadi. Ed ir en Russia n’è betg simpel!

Organisar in sgol è spert fatg. Trametter infurmaziuns e fotografias als organisaturs era. Pli pretensius vegni, cura ch’i va per in visum. Quel survegn ins be cun conferma da l'organisatur russ. E fin che tut è avant maun, ston ins emplenir divers formulars ed avair confermas da l’assicuranza da malsauns. In pèr dis avant la partenza arriva il visum dal consulat russ a Berna. Lura mancan sulettamain in pèr rubels per expensas pli pitschnas a Moscau.

Il festival da folk da la EBU, in eveniment da tradiziun

Il festival da la EVU datti dapi il 1980, ed el ha fatg staziun en citads da tut l’Europa: Da Førde en la Norvegia, Cork en l’Irlanda, Segovia en Spagna, Viljandi en l’Estonia e quest onn a Moscau. Er la 39avla ediziun è deditgada a la musica populara – da folk e folclora da tut l’Europa – e vuless mussar sia gronda ritgezza e varietad. Però era procurar per inscunters che collian pajais e culturas è ina da las finamiras. In’autra è quella da preservar tradiziuns unicas e da las far udir ad in auditori pli grond.

Il festival da quest onn è vegnì organisà a Moscau da «Radio Orpheus», ina staziun statala che tgira musica classica e tradiziunala, e che ha divers orchesters e chors da gronda qualitad. Las represchentaziuns dal festival èn stadas dals 26 fin ils 28 da matg en la sala da concerts da la tur da televisiun Ostankino ch'ha plaz per 750 persunas.

video
Curdin e Domenic Janett a Moscau
Or da RTR dals 04.06.2018.
laschar ir. Durada: 3 minutas 39 Secundas.

La furmaziun svizra

Il duo «Curdin e Domenic Janett» ha fatg il 2014 in disc cun il titel «Invenziuns» cun atgnas cumposiziuns, tocs tradiziunals ed er tocs d’auters cumponists sco Giacomo Sartori e Harald Haugaard.

Lur concert al Festival da Folk da la EBU a Moscau emetta il Radio Rumantsch gievgia, ils 21 da zercladur a las 19.00.

Ils «Tschiainders»

Avrir la box Serrar la box

Tschiainders vegnan numnads ils abitants da Tschlin en las istorgias da Guadench Barblan. Quels da Ramosch èn ils Süblats, ils da Sent ils Asens.

Artitgels legids il pli savens