Questa saira cumenza la festa da musica chantunala cun las occurrenzas d’avertura. Pir damaun sonda vegn quai lura propi serius per ils 2'000 musicants e musicantas. La bunura cumenzan las producziuns da festa per las 43 musicas grischunas e las 8 musicas ospitantas. Las musicas participantas sa concurrenzeschan e preschentan mintgamai il toc da pensum sco era in toc da pag. Set da las gruppas sa participeschan senza concurrenza, quai vul dir ellas preschentan in pitschen program da concert, retschaivan per gliez bain in parairi dals experts, dentant nagina rangaziun tenor puncts. Betg d’emblidar è la concurrenza da marschar. Per in ambient ideal procura il tschancun da marschar che maina sur la via da promenada sper il lai d'Arosa.
Emissiuns da la festa
Artg Musical | Dumengia ils 23-06-2019 a las 14:00 -16:00 uras |
L'instrumentala | Mesemna ils 26-06-2019 a las 19:00 uras u gievgia ils 27-06-2019 a las 14:00 uras |
Artg Musical | Dumengia ils 30-06-2019 a las 14:00 uras u glindesdi ils 01-07-2019 a las 14:00 uras |
L'instrumentala | Mesemna ils 03-07-2019 a las 19:00 uras u gievgia 04-07-2019 a las 14:00 uras |
Tadlar e guardar las producziuns tar RTR
Era nus da RTR visitain Arosa quels dis da festa. Nus registrain per Vus tut las producziuns da festa e rapportain da quai che curra e passa. Sche Vus na pudais betg prender las 360 stortas da Cuira fin Arosa n'è quai tut betg uschè nausch. Vus pudais era tadlar la musica da festa davent da chasa. En quatter emissiuns spezialas da «L'instrumentala» e da «Artg musical» preschentain nus las producziuns da la festa da musica chantunala. Suenter la festa mettain nus er a disposiziun tuttas registraziuns da las producziuns da festa.
RR actualitad 11:00