Siglir tar il cuntegn
cuntegn

2018 - Rezia Cantat Ci vediamo a Chiavenna!

A Chiavenna s'inscuntran passa 3'400 chantaduras e chantadurs da 116 chors dal Grischun, da la Svizra Bassa e da la Lumbardia. Il chant unescha giuven e vegl, Svizzers e Talians.

La festa cumenza

Questa saira cumenza finalmain la festa da chant chantunala extra muros a Chiavenna. La citad taliana spetga questa fin d'emna var 3'400 chantaduras e chantadurs. In eveniment che vegn ad esser cun tanta glieud ina gronda svida. Ma era l'aura para d'esser da la vart dals organisaturs: la fin d'emna vegn quintà cun fitg bell'aura enturn 30 grads. Dentant tuttina prender l'umbrella, i po adina dar in curt urizi e l'umbrella pon ins uschiglio era duvrar per sa proteger dal sulegl.

Sch’il Partenz conquista Chiavenna

Il Kinder- und Jugendchor Prättigau è in dals sulets chors d’uffants grischuns che sa participescha a la festa da chant chantunala a Chiavenna. Iris Vogt Klaas dirigia 22 uffants tranter 8 e 16 onns. Els vegnan accumpagnads dal Jugendensemble Prättigau che ha 10 chantaduras e chantadurs ch’èn pli vegls che 16 onns. Els tuts èn versads cun festas da chant. Experientscha han els rimnà als festivals dals chors da giuvenils SKJF. Ma forsa èsi tuttina in zic auter dad ir ad ina festa dals chors «vegls»?

Kinder- und Jugendchor Prättigau.
Legenda: Kinder- und Jugendchor Prättigau. MAD

Anniversari curt avant ch’i va liber

Jon Fadri Huder è il co-president dal comité d’organisaziun da Rezia Cantat. L’emna avant la festa da chant datti anc bler da far. Ils 6 dals 6 datti dentant era mails, telefons e visitas per gratular. Jon Fadri Huder è naschì ils 06-06-1966 e po pia festivar ses 52avel anniversari. Cordiala gratulaziun!

Purtret d'in um cun chavels alvs ed egliers, el porta ina chamischa e tschiep.
Legenda: Jon Fadri Huder, co-president da Rezia Cantat. RTR, Armon Schlegel

En purziuns da Son Gagl a Chiavenna

Il Chor Bündner Verein St. Gallen è gia sa participà a la festa da chant chantunala a Trun avant 6 onns. Cun 45 chantaduras e chantadurs sa preschenta il chor a Chiavenna, ma en il bus che charrescha sonda vers sid sesan «be» 20 dad els. Ils auters van gia avant en l’Italia dal Nord. U per sa climatisar u per giudair in pau il «dolce far niente».

Preschentaziun: sonda, ils 9 da zercladur a las 15:00 en la Chiesa san Fedele.

purtret dal chor Bündner Verein St. Gallen
Legenda: Il Chor Bündner Verein St. Gallen MAD

Naginas chombras libras a Chiavenna – ma tuttina «Zimmer frei»

Il Coro Zimmer frei è ina gruppa da chant a capella da la regiun da Sondrio. Ils 15 chantadurs e las chantaduras chantan chanzuns modernas. Lur dirigenta Valentina Mazzoleni instruescha chant a la scola da musica Poschiavo.

Il num «Zimmer frei» hajan els elegì perquai ch'els vivan datiers da la Svizra ed audian perquai savens il tudestg. Lur finamira saja da dar concerts en tut las chombras libras.

Preschentaziun: sonda, ils 9 da zercladur a las 16:45 en la Chiesa Santa Maria.

15 chantaduras e chantadurs porschan chant e show.
Legenda: Zimmer frei – in chor da la regiun da Sondrio. 15 chantaduras e chantadurs porschan chant e show. MAD, coro Zimmer frei

Mintga di a las 8:10 al Radio Rumantsch

glindesdi, 04.06.2018
Coro «Zimmer frei», Sondrio
mardi, 05.06.2018
Chor Bündner Verein St. Gallen
mesemna, 06.06.2018
Jon Fadri Huder, co-president comité d'organisaziun Rezia Cantat
gievgia, 07.06.2018
Kinder- und Jugendchor Prättigau
venderdi, 08.06.2018
Anna Caprez, correspundenta RTR, live da Chiavenna

RR actualitad 08:00