Siglir tar il cuntegn
cuntegn

2017 - Falera conta Falera ha chantà – festa da chant sursilvana è stada in success

Sonda è Falera stà cumplainamain sut l’ensaina dal chant da chors. Ch'il comitè d'organisaziun è turnà suenter blers onns danovamain tar il sistem da far tut la festa da chant en in di ha sa cumprovà, di Marc Cabrin dal comité d'organisaziun. La festa haja carmalà passa 2'500 persunas si Falera.

Legenda: Guardar il video Falera ha chantà. Durada 03:00 minutas.
Or da Actualitad video dals 11.06.2017.

A Falera è vegnida nizzegiada l'occasiun da far gist duas festas il medem di: Per l'ina èsi stà la 45avla festa da chant sursilvana, e per l’autra ha il district da chant Surselva pudì celebrar ses giubileum da 150 onns.

Far tut en in di è sa cumprovà

Da turnar suenter tants onns puspè tar il modus da far tut la festa en in di, saja stà in experiment, ha Marc Cabrin dal comité d'organisaziun da la festa da chant, ditg sin dumonda da RTR.

Dentant – l'experiment haja sa cumprovà:

Jau crai, che quai saja in success cumplain. Nus vain fitg, fitg positivs resuns or da las retschas dals chors. Nus essan fitg, fitg cuntents.
Autur: Marc Cabrinvicepresident comité d'organisaziun, 45avla festa da chant sursilvana

Per celebrar las 45avla festa da chant sursilvana ed il giubileum da 150 onns district da chant Surselva è Falera daventà in grond vitg da festa – in vitg da chant. 1'000 chantaduras e chantadurs da 32 chors èn s'entupads, ed almain anc ina giada tants visitaders.

En las duas baselgias – la parochiala e la baselgia s. Rumetg – han ils chors preschentà 80 chanzuns da pac. La «Plazza fontauna» da Falera è sa midada en in vitget da chant cun tribuna cuverta, blers stans e tendas da festa.

RTR ha gizzà egls ed ureglias per Vus

Geabain, era ils egls. Quest onn ha quai dà in novum: Sche vus n'avais betg pudì ir sezs a chantar e tadlar a Falera, porta RTR a Vus ils maletgs e tuns directamain en stiva, cura che Vus vulais.

RTR ha filmà tut las producziuns da festa dals 32 chors. Quels videos pudais vus lura guardar dapertut ed adina sin nossa pagina rtr.ch/faleraconta.

RR actualitad 08:00++