Taisser è in mastergn u plitost in artisanadi fitg industrialisà. Ozendi datti be anc paucas fatschentas che porschan tailas fatgas a maun cun ils talers. Ina da questas fatschentas è la Tessanda Val Müstair. La mainagestiun da la manufactura, Maya Repele, ha inizià in project da musica che duai nizzegiar ils suns ritmics dals talers.
En la broschura da la Tessanda stat: «Tac-tac-tac-tac-tac-tac – das warm-hölzerne Klacken der Webstühle ist im grosszügigen Verkaufsraum der Tessanda und draussen auf der Plaz d’Ora gut zu hören. Rhythmische Klänge, die einen erfassen und die Stimmung heben.»
La fundaziun Tessanda ha surdà a la cumponista Helena Winkelman l'incumbensa per in'ovra che duai metter en musica la natira da la Val Müstair cun ses umans ed il ritmus dals talers, quasi entreschar questas duas chaussas. En il project cun il num «In die Zeit gewoben» porscha l'art da taisser maun a l'art da tun.
Helena Winkelman ha uschia stgaffì l'ovra «Minimal Minima», ina sort musica minimalistica ch'integrescha il ritmus monoton e repetitiv dals talers. A posta per scriver quest ovra ha ella passentà pliras emnas en la Val Müstair, ha fatg spassegiadas per sentir l'atmosfera da la vallada e per prender si quai en si'ovra.
Dumengia, ils dus da fanadur 2022 è stada la primaudiziun en la stalla da la claustra Müstair. L'Ensemble Kugelförmigkeit cun la manadra Francesca Gaza han preschentà l'ovra da Winkelman ed era duas ovras da Gaza sez.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
