Siglir tar il cuntegn

Header

audio
La Hanneli-Musig al festival da folk da la EBU
Or da Artg musical dals 20.11.2022.
laschar ir. Durada: 57 minutas 7 Secundas.
cuntegn

Artg musical La Hanneli-Musig al festival da folk da la EBU

La chapella da renum ha represchentà questa stad la Svizra a Rudolstadt.

Cumenzà ha tut cun Hanny Christen. Ella ha vivì dal 1899 fin dal 1976 ed ha ramassa in grond stgazi da musica populara, sauts che fissan forsa ids a perder. A partir dal 1940 aveva ella notà millis da melodias ed il 1963 ha ella surdà sia collecziun a la biblioteca da l’universitad da Basilea – e là resta quella durant 30 onns.

Il 1992 chatta il musicant e cumponist Fabian Müller per cas il relasch da Hanny Christen. Ils 12'000 sauts vegnan sortids, cataloghisads – ed il 2002 vegn publitgada la collecziun da la chasa editura Mülirad.   

Ina dunna che scriva
Legenda: Hanni Christen durant sia lavur MAD

Nova vita per sauts emblidads

Suenter la publicaziun datti grond interess da chapellas e furmaziuns che cumenzan a sunar quests sauts. La pli impurtanta è però la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà 8 discs cun sauts da tut la Svizra, han fatg  tschients concerts ed han procurà ch’ils sauts da la collecziun da Hanny Christen na restan be en ils truclets. Ina schelta da quels han els preschentà a Rudolstadt, al 30avel Festival da folk da la EBU e quest concert udis questa dumengia a las 14.00 tar RTR.

La segunda ura dal Artg musical

Durant la segunda part da l'emissiun preschentain nus dus dals 130 concerts dal 30avel Festival da folk da la EBU. Quel è sta en il rom dal festival da Rudolstadt, il pli grond da ses gener cun in vast program da musica populara e da folk da tut ils continents.

dus dunnas ed in um cun instruments
Legenda: Il trio Gruberich da la Bavaria MAD
audio
Il festival da folk da la EBU a Rudolstadt
ord Artg musical dals 20.11.2022.
laschar ir. Durada: 57 minutas 43 Secundas.

 

Gruberich da la Bavaria

Ina furmaziun che sa producir maletgs ed atmosferas che mainan nus sin las alps, sut in tschiel plain stailas e schizunt sut aua, cun blera poesia e fantasia – cun tuns loms e subtils e lura er selvadis ed innovativs. Las duas musicistas Maria Freidrich e Sabine Gruber-Heberlein vegnan da la musica classica, èn engaschadas en divers orchesters bavarais – e Thomas Gruber ha sias ragischs en la musica populara, s’interessa per musica veglia e tut ils tuns pussibels ch’el integrescha en sias cumposiziuns.

Trais musicantas ed in musicant
Legenda: Fara da la Scozia MAD

 

Fara da la Scozia

In quartet che vegn da las inslas selvadias dad Orkney, pauc populadas, impressiunantas e cun bleras tradiziuns. Quella musicala tgiran Fara cun Catriona Price, violina e chant, Jeana Leslie e  Silly Simpson violina – e Andrew Dunlop, piano. Lur carriera ha cumenza cun in concert persvadent il 2014 tar il Orkney Folk Festival – e dapi là èn ellas stadas en gir sin tut il mund e tar blers festivals impurtants, uschia er la stad passada a Rudolstadt.

Artitgels legids il pli savens

Scrollar a sanestra Scrollar a dretga